ବରଗଡ: ମଥୁରା ନାଗରୀର କାରାଗାରରେ ଦେବକୀ ଓ ବସୁଦେବଙ୍କୁ ବନ୍ଦୀ କରି ରଖିଛନ୍ତି ମହାରାଜ କଂସ । ଦେବକୀଙ୍କ ଗୋଟିଏ ପରେ ଗୋଟିଏ କରି ଶିଶୁ ପୁତ୍ର ମାନଙ୍କୁ ହତ୍ୟା କରିଚାଲିଛନ୍ତି କଂସ | ଅନ୍ୟପଟେ ପିତା ଉଗ୍ରସେନଙ୍କୁ ମଧ୍ୟ ପୁତ୍ର କଂସ ରାତ୍ରି ଜଗୁଆଳି ରୂପେ କାର୍ଯ୍ୟଭାର ଦେଇଛନ୍ତି | ତେବେ ଆଜି କାରାଗାରରେ ସମସ୍ତ ସୈନ୍ୟ ସାମନ୍ତ ଅଚେତ ହୋଇପଡିଥିଲେ ଏବଂ ଏକ ଅଲୌକିକ ଶକ୍ତି ଦ୍ଵାରା କାରାଗାରର ସମସ୍ତ କବାଟ ଖୋଲିଯାଇଥିଲା | ଦେବକୀଙ୍କ ଅଷ୍ଟମ ସନ୍ତାନ କାରାଗାର ଭିତରେ ଜନ୍ମ ଗ୍ରହଣ କଲା ପରେ ଘଟିଛି ଏପରି ଅଦ୍ଭୁତ ଘଟଣା |
ଦେବକୀଙ୍କ ଗୋଟିଏ ପରେ ଗୋଟିଏ ଶିଶୁପୁତ୍ରଙ୍କୁ କଂସ ହତ୍ୟା କରି ଚାଲିଥିବା ବେଳେ ସପ୍ତମ ସନ୍ତାନ ଆକସ୍ମିକ ଭାବେ ଅର୍ନ୍ତଧ୍ୟାନ ହୋଇଯାଇଛି । ଏହାପରେ କଂସର ଅତ୍ୟାଚାରରୁ ମଥୁରାବାସୀଙ୍କୁ ଉଦ୍ଧାର କରିବା ପାଇଁ ଏକ ଆଲୌକିକ ସମୟରେ ଭଗବାନ ଶ୍ରୀକୃଷ୍ଣ ଦେବକୀଙ୍କ ଅଷ୍ଟମ ଗର୍ଭରୁ ଜନ୍ମନେଇଥିବା ବେଳେ କାରାଗାରର ସମସ୍ତ ଜଗୁଆଳୀ କାଳନିଦ୍ରାରେ ଶୋଇ ପଡ଼ିଛନ୍ତି । ଏହି ସମୟରେ ସ୍ବୟଂ ବିଷ୍ଣୁ ବସୁଦେବଙ୍କୁ ସପ୍ନାଦେଶ ଦେଇଥିବା ବେଳେ ଦେବକୀଙ୍କ ଅଷ୍ଟମ ଗର୍ଭସନ୍ତାନଙ୍କୁ ଗୋପପୁରରେ ଛାଡ଼ିଦେବାକୁ ଆଦେଶ ଦେଇଛନ୍ତି ।
ଏହାପରେ ମଥୁରା କାରାଗାରର ସମସ୍ତ ଦ୍ବାର ଆପେ ଆପେ ଖୋଲିଯାଇ ଥିବା ବେଳେ ଭଗବାନ ଶ୍ରୀକୃଷ୍ଣଙ୍କୁ ଧରି ବସୁଦେବ ବାହାରି ପଡ଼ିଛନ୍ତି ଗୋପପୁରକୁ । ଠିକ୍ ଏତିକି ବେଳେ ମହାରାଜ କଂସଙ୍କ କଟୁଆଳ ସାଜିଥିବା ଉଗ୍ରସେନ ବାସୁଦେବଙ୍କ ପଥ ଓଗାଳି ଥିବା ବେଳେ ଶ୍ରୀକୃଷ୍ଣଙ୍କ ଦେହରେ ଭଗବାନ ବିଷ୍ଣୁଙ୍କ ରୂପ ଦେଖି ଆତ୍ମବିଭୋର ହୋଇପଡ଼ିଛନ୍ତି ଏବଂ ବସୁଦେବଙ୍କ ପଥ ଛାଡ଼ିଦେଇଛନ୍ତି । ଏହାପରେ ବସୁଦେବ ଯମୁନା ନଇଁ ପାରିହୋଇ ନନ୍ଦଭବନକୁ ପହଞ୍ଚି ସେଠାରେ ଯଶୋଦାଙ୍କ କୋଳରେ ଶ୍ରୀକୃଷ୍ଣଙ୍କୁ ଥୋଇ ଦେଇ ବଜୁଳିକନ୍ୟା ସହ ମଥୁରାକୁ ପ୍ରତ୍ୟାବର୍ତ୍ତନ କରିଛନ୍ତି ।
ବରଗଡରୁ ରାଜେଶ ସରପ,ଇଟିଭି ଭାରତ
