ଅନୁଗୋଳ: ରାଜ୍ୟରେ ବଢି ଚାଲିଛି କୋରୋନା ଆତଙ୍କ । ଏମିତିରେ ଅନୁଗୋଳ ଜିଲ୍ଲାରେ ମଧ୍ୟ ଅନିୟନ୍ତ୍ରିତ ହେବାରେ ଲାଗିଛି କୋରାନା ପରିସ୍ଥିତି । ରବିବାର ଜିଲ୍ଲାରେ ସର୍ବାଧିକ 25 ଜଣ ପଜିଟିଭ ଚିହ୍ନଟ ହୋଇଥିବା ବେଳେ ଏମାନଙ୍କ ମଧ୍ୟରୁ 15 ଜଣ କେବଳ ସହରାଞ୍ଚଳରୁ ହୋଇଥିବା ଜଣା ପଡିଛି । ଏନେଇ ସୂଚନା ଦେଇଛି ଜିଲ୍ଲା ସୂଚନା ଓ ଲୋକ ସମ୍ପର୍କ ବିଭାଗ ।
ସୂଚନା ମୁତାବକ ସଦ୍ୟ ଚିହ୍ନଟ ଆକ୍ରାନ୍ତଙ୍କ ମଧ୍ୟରେ 20 ଜଣ ତାଳଚେର ଅଞ୍ଚଳରୁ ରହିଛନ୍ତି । ସେହିପରି 3 ଜଣ ଅନୁଗୋଳ ପୌରପାଳିକା ଅଞ୍ଚଳରୁ ଚିହ୍ନଟ ହୋଇଥିବା ବେଳେ ଅନ୍ୟ ଦୁଇ ଜଣଙ୍କ ମଧ୍ୟରେ ଜଣେ ରାଷ୍ଟ୍ରାୟତ୍ତ ଉଦ୍ୟୋଗରେ କାର୍ଯ୍ୟରତ ଓ ଜଣେ ଛେଣ୍ଡିପଦାରୁ ବୋଲି ଜଣା ପଡିଛି । ତାଳଚେରରୁ ଚିହ୍ନଟ 20 ଜଣଙ୍କ ମଧ୍ୟରୁ 12 ପୌରପାଳିକାରୁ ହୋଇଥିବା ବେଶେ ବଳକା 8 ଜଣ ବ୍ଲକ ଅଞ୍ଚଳରୁ ଚିହ୍ନଟ ହୋଇଛନ୍ତି । ଯାହାଙ୍କ ମଧ୍ୟରେ ଜଣେ ଗଞ୍ଜାମ ଫେରନ୍ତାଙ୍କ ସଂସ୍ପର୍ଶରେ ଓ ବଳକା ପାରାଦୀପ ଫେରନ୍ତାଙ୍କ ସଂସ୍ପର୍ଶରେ ଆସି ସଂକ୍ରମିତ ହୋଇଥିବା ଜଣା ପଡିଛି ।
ସେହିପରି ବ୍ଲକ ଅଞ୍ଚଳରେ ଆକ୍ରାନ୍ତମାନେ ମଧ୍ୟ ଗଞ୍ଜାମ ଫେରନ୍ତା ବୋଲି ସୂଚନା ଦିଆଯାଇଛି । ଏଥିସହ ଅନୁଗୋଳ ପୌରପାଳିକାରୁ ଗୋଟିଏ ପରିବାରର 3 ଆକ୍ରାନ୍ତ ଚିହ୍ନଟ ହୋଇଥିବା ଜଣାପଡିଛି । ତେବେ ସେମାନ କାହା ସଂସ୍ପର୍ଶରେ ଆସି ଆକ୍ରାନ୍ତ ହେଲେ କିମ୍ବା ତାଙ୍କ ଟ୍ରାଭେଲ ହିଷ୍ଟ୍ରି ସମ୍ପର୍କରେ କୌଣସି ସୂଚନା ଦିଆଯାଇନାହିଁ । ସେପଟେ ସମସ୍ତ ଆକ୍ରାନ୍ତଙ୍କୁ ଚିକିତ୍ସା ପାଇଁ ତାଳଚେର କୋଭିଡ ହସ୍ପିଟାଲାକୁ ସ୍ଥାନାନ୍ତର କରାଯାଇଛି ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
