ଗୌହାଟୀ: ବିଶ୍ବକପ୍ ପରେ ପରେ ଭାରତ ଓ ଅଷ୍ଟ୍ରେଲିଆ ମଧ୍ୟରେ ଆରମ୍ଭ ହୋଇଥିବା ଟି୨୦ ଶୃଙ୍ଖଳାରେ ଢେର ଆଗରେ ରହିଛି ଭାରତ । ୫ ମ୍ୟାଚ୍ ବିଶିଷ୍ଟ ଏହି ଶୃଙ୍ଖଳାରେ ପ୍ରଥମ ଦୁଇଟି ମ୍ୟାଚ୍ ଜିତି ୨-୦ରେ ଅଷ୍ଟ୍ରେଲିଆକୁ ପଛରେ ପକାଇଛି ଟିମ୍ ଇଣ୍ଡିଆ । ବଳକା ୩ ମ୍ୟାଚ୍ ଭିତରୁ ସିରିଜ୍ ଜିତିବା ପାଇଁ ଭାରତକୁ କେବଳ ଗୋଟିଏ ବିଜୟ ଆବଶ୍ୟକ । ଆଗାମୀ ମ୍ୟାଚ୍ ନଭେମ୍ବର ୨୮ ତାରିଖ (ମଙ୍ଗଳବାର) ଗୌହାଟୀର ବାର୍ସାପାରା ସ୍ଥିତ ଆସାମ କ୍ରିକେଟ ଆସୋସିଏସନ୍ ଷ୍ଟାଡିୟମରେ ଖେଳାଯିବ । ଏହି ମ୍ୟାଚ୍ ଜିତି ଭାରତ ସିରିଜ୍ ସିଲ୍ କରିବା ଲକ୍ଷ୍ୟରେ ରହିଥିବାବେଳେ ଏଠାକାର ରେକର୍ଡ କିନ୍ତୁ ଘରୋଇ ଦଳ ଅପେକ୍ଷା ଅଷ୍ଟ୍ରେଲିଆ ସପକ୍ଷରେ ରହିଛି ।
ବିଶ୍ବକପ୍ ପରେ ବରିଷ୍ଠ କ୍ରିକେଟର ଅନୁପସ୍ଥିତିରେ ପ୍ରଥମ ଥର ପାଇଁ ଟିମ୍ ଇଣ୍ଡିଆର ନେତୃତ୍ବ ନେଉଛନ୍ତି ସୂର୍ଯ୍ୟକୁମାର ଯାଦବ । ଦଳରେ ଅନେକ ଯୁବ ତାରକାଙ୍କୁ ନେଇ ସେ ପ୍ରଥମ ଦୁଇଟି ମ୍ୟାଚ୍କୁ ଅଷ୍ଟ୍ରେଲିଆ ହାତରୁ ଛଡ଼ାଇ ଆଣିବାରେ ସଫଳ ହୋଇଛନ୍ତି । ସିରିଜ୍ ବିଜୟ ପାଇଁ ଭାରତକୁ ବଳକା ୩ ମ୍ୟାଚ୍ରୁ କେବଳ ଗୋଟିଏ ବିଜୟ ଆବଶ୍ୟକ । ହେଲେ ତୃତୀୟ ମ୍ୟାଚ୍ର ଭେନ୍ୟୁର ପୂର୍ବ ରେକର୍ଡ ଭାରତୀୟ ଦଳ ସପକ୍ଷରେ ନାହିଁ । ଯାହା ଭାରତୀୟ ଖେଳାଳିଙ୍କ ଚିନ୍ତା ବଢ଼ାଇଛି । ଏହି ଷ୍ଟାଡିୟମରେ ଭାରତ କେବଳ ଗୋଟିଏ ମ୍ୟାଚ୍ ଜିତିଥିବାବେଳେ ଏଠାରେ ଅଷ୍ଟ୍ରେଲିଆର ବିଜୟ ଶତପ୍ରତିଶତ ରହିଛି ।
ଏହା ମଧ୍ୟ ପଢ଼ନ୍ତୁ...କ୍ରମାଗତ ୨ୟ ଟି୨୦ରେ ଧୂଳି ଚାଟିଲା ଅଷ୍ଟ୍ରେଲିଆ, ୪୪ ରନ୍ରେ ମ୍ୟାଚ୍ ଜିତି ୨-୦ରେ ଆଗୁଆ ଭାରତ
ବାର୍ସାପାରା କ୍ରିକେଟ୍ ଷ୍ଟାଡିୟମରେ ଏ ପର୍ଯ୍ୟନ୍ତ କେବଳ ୩ଟି ଟି୨୦ ଅନ୍ତର୍ଜାତୀୟ ମ୍ୟାଚ୍ ଖେଳାଯାଇଛି । ୨୦୧୭ରୁ ୨୦୨୨ ମଧ୍ୟରେ ଏହି ସମସ୍ତ ୩ ମ୍ୟାଚ୍ ଖେଳାଯାଇଛି । ତେବେ ଏହି ୩ ଟି୨୦କୁ ବିଚାରକୁ ନେଲେ ଏଠାରେ ଅଷ୍ଟ୍ରେଲିଆର ବିଜୟ ରେକର୍ଡ ଶତପ୍ରତିଶତ ରହିଛି । ଅଷ୍ଟ୍ରେଲିଆ ଏଠାରେ ଭାରତ ବିପକ୍ଷରେ ମାତ୍ର ଗୋଟିଏ ଟି୨୦ ଅନ୍ତର୍ଜାତୀୟ ମ୍ୟାଚ୍ ଖେଳିଛି । ଏହି ମ୍ୟାଚ୍ରେ କଙ୍ଗାରୁ ଦଳ ୮ ୱିକେଟ୍ରେ ଭାରତ ଠାରୁ ମ୍ୟାଚ୍ ଛଡ଼ାଇ ନେଇଥିଲା । ଅନ୍ୟପଟେ ଏହି ଗ୍ରାଉଣ୍ଡରେ ମୋଟ ୩ ଟି୨୦ ଆନ୍ତର୍ଜାତୀୟ ମ୍ୟାଚ୍ ଖେଳିଛି ଟିମ୍ ଇଣ୍ଡିଆ । ଏହା ଭିତରୁ ଭାରତ କେବଳ ଗୋଟିଏ ମ୍ୟାଚ୍ ଜିତିଥିବାବେଳେ ଅଷ୍ଟ୍ରେଲିଆ ବିପକ୍ଷ ମ୍ୟାଚ୍ ହାରିଥିଲା । ଅନ୍ୟ ମ୍ୟାଚ୍ଟି ଶ୍ରୀଲଙ୍କା ବିପକ୍ଷରେ ଖଳିଥିଲା ଭାରତ । ଯାହା ଅମୀମାଂସିତ ରହିଥିଲା ।
ବ୍ୟୁରୋ ରିପୋର୍ଟ, ଇଟିଭି ଭାରତ
