ନୂଆଦିଲ୍ଲୀ: ଆଫଗାନିସ୍ତାନରେ ଚାଲିଥିବା ସଙ୍କଟ ମଧ୍ୟରେ ଭାରତରେ ପ୍ରଶିକ୍ଷଣ ନେଉଥିବା ଆଫଗାନିସ୍ତାନ ସୈନ୍ୟଙ୍କ ପ୍ରଶିକ୍ଷଣ ପୂର୍ବ ପରି ଜାରି ରଖିବାକୁ ନିଷ୍ପତ୍ତି ନେଇଛି ଭାରତ । ସେନା ପକ୍ଷରୁ ମିଳିଥିବା ସୂଚନା ଅନୁସାରେ ,ବର୍ତ୍ତମାନ ଭାରତରେ ପ୍ରାୟ 130 ଆଫଗାନିସ୍ତାନ ସୈନ୍ୟ ପ୍ରଶିକ୍ଷଣ ଗ୍ରହଣ କରୁଛନ୍ତି। ଏମାନେ ମିଲିଟାରୀ ଏକାଡେମୀ ସମେତ ଅନ୍ୟକିଛି ସାମରିକ ପ୍ରତିଷ୍ଠାନରେ ଭାରତୀୟ ସେନାର ତତ୍ବାବଧାନରେ ପ୍ରଶିକ୍ଷିତ ହେଉଛନ୍ତି ।
ଆଫଗାନିସ୍ତାନରେ ସରକାର ବରଖାସ୍ତ ଓ ତାଲିବାନ ସମ୍ମୁଖରେ ସେନାର ସମ୍ପୂର୍ଣ୍ଣ ଆତ୍ମସମର୍ପଣ ପରେ ଏମାନଙ୍କ ପ୍ରଶିକ୍ଷଣ ଉପରେ ପ୍ରଶ୍ନ ଉଠିଥିଲା । ତେବେ ଏସବୁ ଭିତରେ ସେମାନଙ୍କ ପ୍ରଶିକ୍ଷଣ ପୂର୍ବ ପରି ଜାରି ରଖିବା ନେଇ ଭାରତ ସରକାର ସ୍ଥିର କରିଛନ୍ତି । ପୂର୍ବ ଚୁକ୍ତି ଅନୁସାରେ ଏମାନଙ୍କ ପ୍ରଶିକ୍ଷଣ କୋର୍ସ ଶେଷ ହେବାଯାଏ ପ୍ରଶିକ୍ଷଣ ଜାରି ରଖିବ ଭାରତ । ପ୍ରଶିକ୍ଷଣ ଶେଷ ହେବା ପରେ ଏମାନଙ୍କ ଥଇଥାନ ନେଇ କିଛି ଆଲୋଚନା ମଧ୍ୟ କରିପାରନ୍ତି ଭାରତୀୟ କର୍ତ୍ତୃପକ୍ଷ। ଏନେଇ ସେନା ପକ୍ଷରୁ ସୂଚନା ମିଳିଛି ।
ପୂର୍ବରୁ ମଧ୍ୟ ଗତ ଏକ ଦଶନ୍ଧି ଧରି ଅନେକ ଆଫଗାନିସ୍ତାନ ସୈନ୍ୟ ଭାରତୀୟ ସେନା କ୍ୟାମ୍ପରେ ପ୍ରଶିକ୍ଷଣ ଶେଷ କରି ସ୍ବଦେଶ ପ୍ରତ୍ୟାବର୍ତ୍ତନ କରିଥିଲେ। ବର୍ତ୍ତମାନ ମିଳିଥିବା ସୂଚନା ଅନୁସାରେ, 80 ଆଫଗାନିସ୍ତାନ ସୈନ୍ୟ ଭାରତୀୟ ମିଲିଟାରି ଏକାଡେମୀ ଓ ପ୍ରାୟ 50 ଜଣ ପ୍ରଶିକ୍ଷାର୍ଥୀ ଚେନ୍ନାଇ ସେନାଧିକାରୀ ପ୍ରଶିକ୍ଷଣ ଏକାଡେମୀ ଓ ଭାରତୀୟ ପ୍ରତିରକ୍ଷା ପ୍ରତିଷ୍ଠାନରେ ପ୍ରଶିକ୍ଷଣ ଗ୍ରହଣ କରୁଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
