ବ୍ରହ୍ମପୁର: ଆସନ୍ତା ୬ ତାରିଖ (ବୁଧବାର) ବ୍ରହ୍ମପୁର ଗସ୍ତରେ ଆସିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଯାହାକୁ ନେଇ ମୋଦିଙ୍କ ଗସ୍ତ ପୂର୍ବରୁ ସୁରକ୍ଷା ଠାରୁ ଆରମ୍ଭ କରି ବିଭିନ୍ନ ବିଷୟରେ ଜିଲ୍ଲା ପ୍ରଶାସନ ଓ ପୋଲିସ ପ୍ରଶାସନ ପକ୍ଷରୁ ମିଳିତ ସମୀକ୍ଷା ବୈଠକ କରାଯାଇଛି । ସାଧାରଣ ନିର୍ବାଚନକୁ ନେଇ ବ୍ରହ୍ମପୁର ସହର ଉପକଣ୍ଠ କନିଷି ଠାରେ ମୋଦିଙ୍କ ଆଗାମୀ ସାଧାରଣ ସଭା ହେବାକୁ ରହିଥିବା ବେଳେ ଏହି ସଭାରେ ଲକ୍ଷାଧିକ ଜନସମାଗମ ହେବାର ରହିଛି । ପ୍ରଧାନମନ୍ତ୍ରୀଙ୍କ ସୁରକ୍ଷାକୁ ନେଇ ଆଜି ବୈଠକରେ ଆଲୋଚନା କରାଯାଇଛି ।
ଆସନ୍ତା ୬ ତାରିଖ ଦିନ ସକାଳ ୧୦ ଟା ସମୟରେ ବ୍ରହ୍ମପୁର ଗସ୍ତରେ ଆସିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । କନିଷି ଠାରେ ଆୟୋଜିତ ଦଳୀୟ କାର୍ଯ୍ୟକ୍ରମରେ ଯୋଗଦେଇ ଜନସାଧାରଣଙ୍କୁ ଉଦ୍ବଧନ ଦେବେ । ତେବେ ମୋଦିଙ୍କ ଗସ୍ତକୁ ନେଇ ଆଜି ବ୍ରହ୍ମପୁର ମହାନଗର ନିଗମ ସମ୍ମିଳନୀ କକ୍ଷରେ ଜିଲ୍ଲାପ୍ରଶାସନ, ପୋଲିସ ପ୍ରଶସାନ ଏବଂ ପ୍ରଧାନମନ୍ତ୍ରୀଙ୍କ ସୁରକ୍ଷା ଦାୟିତ୍ୱରେ ରହିବାକୁ ଥିବା ଅଧିକାରୀମାନେ ବୈଠକେରେ ଆଲୋଚନା କରିଛନ୍ତି । ମୋଦିଙ୍କ ସଭା ସ୍ଥଳ, ହେଲିପ୍ୟାଡ୍ ସ୍ଥାନ, ଜନସାଧାରଣଙ୍କ ପ୍ରବେଶ, ଟ୍ରାଫିକ୍ ବ୍ୟବସ୍ଥା ଓ ପାର୍କିଂ ସ୍ଥାନ ଚିହ୍ନଟ ଭଳି ସମସ୍ତ ବ୍ୟବସ୍ଥା ସହିତ ପୋଲିସ ଠାରୁ ଆରମ୍ଭ କରି ଅଗ୍ନିଶମ ବିଭାଗ, ବିଦ୍ୟୁତ ବିଭାଗ ଓ ସ୍ବାସ୍ଥ୍ୟ ବିଭାଗ ଭଳି ବିଭିନ୍ନ ବିଭାଗର ଅଧିକାରୀମାନେ ଏଥିରେ ଉପସ୍ଥିତ ରହିଥିଲେ ।ବୈଠକେରେ ବ୍ରହ୍ମପୁର ଆରକ୍ଷୀ ଅଧିକ୍ଷକ ଦାୟିତ୍ବରେ ରହିଥିବା ଡି.ଆଇ.ଡି ସାର୍ଥକ ଷଡଙ୍ଗୀଙ୍କ ଉପସ୍ଥିତିରେ ଆୟୋଜିତ ବୈଠକରେ ସମସ୍ତ ପୋଲିସ ଓ ପ୍ରଶାସନର ଅଧିକାରୀଙ୍କ ସମେତ ଲାଇନ୍ ଡିପାର୍ଟମେଣ୍ଟର ଅଧିକାରୀମାନେ ଉପସ୍ଥିତ ରହିଥିଲେ ।
ସେପଟେ ବ୍ରହ୍ମପୁର ସହରକୁ ପ୍ରଥମ ଥର ପାଇଁ ପ୍ରଧାନମନ୍ତ୍ରୀ ମୋଦି ଆସୁଥିବା ବେଳେ ଏହାକୁ ନେଇ ବିଜେପି ନେତୃବୃନ୍ଦ ଯେତିକି ଖୁସି ରହିଛନ୍ତି ତା ଠାରୁ ଅଧିକା ଉତ୍ସାହିତ ଜନସାଧାରଣ ରହିଥିବା କହିଛନ୍ତି ବିଜେପିର ଜିଲ୍ଲା ସଭାପତି ସୁବାସ ଚନ୍ଦ୍ର ସାହୁ । ଏପରିକି ପ୍ରଧାନମନ୍ତ୍ରୀଙ୍କ ଗସ୍ତକୁ ଦୃଷ୍ଟିରେ ରଖି ସେହି ସ୍ଥାନରେ ସକାଳ ୮ ଘଣ୍ଟା ସୁଦ୍ଧା ସମସ୍ତ ଜନସାଧାରଣ ପହଞ୍ଚିବା ପାଇଁ ଅନୁରୋଧ କରିଛନ୍ତି ସୁବାସ । ରାଜ୍ୟର ପ୍ରଥମ ପର୍ଯ୍ୟାୟ ମତଦାନରେ ବ୍ରହ୍ମପୁର ଲୋକସଭା କ୍ଷେତ୍ରରେ ନିର୍ବାଚନ ହେବାକୁ ଯାଉଥିବା ବେଳେ ଏଭଳି ସମୟରେ ବିଜେପି ଦଳର ସାଂସଦ ଓ ବିଧାୟକ ପ୍ରାର୍ଥୀଙ୍କ ପାଇଁ ବିଜେପି ଦଳର ଷ୍ଟାର ପ୍ରଚାରକମାନେ ଭୋଟ ଭିକ୍ଷା କରୁଛନ୍ତି । ଗତ କିଛି ଦିନ ତଳେ ବିଜେପି ସାଂସଦ ପ୍ରାର୍ଥୀ ପ୍ରଦୀପ କୁମାର ପାଣିଗ୍ରାହୀ ଓ ଲୋକସଭା କ୍ଷେତ୍ରର ସାତୋଟି ବିଧାନସଭା ଆସନର ପ୍ରାର୍ଥୀଙ୍କ ପାଇଁ ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା ବ୍ରହ୍ମପୁର ଗସ୍ତ କରି ଭୋଟ ଭିକ୍ଷା କରିଥିଲେ । ଏହାପରେ ଆସନ୍ତା ୬ ତାରିଖରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବ୍ରହ୍ମପୁର ଗସ୍ତକୁ ନେଇ ଗୋଟିଏ ପଟେ ଉତ୍ସାହ ଲାଗିରହିଥିବା ବେଳେ ଅନ୍ୟପଟେ ପ୍ରଶାସନ ପକ୍ଷରୁ ଆରମ୍ଭ ହୋଇଯାଇଛି ପ୍ରସ୍ତୁତି ।
ଇଟିଭି ଭାରତ, ବ୍ରହ୍ମପୁର
