ସମ୍ବଲପୁର: ଆଗକୁ ସାଧରଣ ନିର୍ବାଚନ । ଏଥିପାଇଁ ପ୍ରମୁଖ ରାଜନୈତିକ ଦଳ ସବୁ ବିଭିନ୍ନ କାର୍ଯ୍ୟକ୍ରମ ଅନୁଷ୍ଠିତ କରି ନିଜ ନିଜ ଉପସ୍ଥିତି ଜାହିର କରୁଛନ୍ତି । ସେପଟେ ସମ୍ବଲପୁର ମଧ୍ୟ ବର୍ତ୍ତମାନ ରାଜନୈତିକ ଉଷ୍ମତା ଭରି ଗଲାଣି । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ବାରମ୍ବାର ସମ୍ବଲପୁର ଗସ୍ତ କରୁଥିବାବେଳେ ସେ ଏଥର ସମ୍ବଲପୁର ନିର୍ବାଚନ ମଣ୍ଡଳୀରୁ ବିଜେପିର ସାଂସଦ ପ୍ରାର୍ଥୀ ହୋଇପାରନ୍ତି ବୋଲି ଚର୍ଚ୍ଚା ହେଉଛି । ଏହି ଚର୍ଚ୍ଚା ଭିତରେ ବିଗତ 15 ଦିନ ମଧ୍ୟରେ ପ୍ରଧାନମନ୍ତ୍ରୀ ଓ ମୁଖ୍ୟମନ୍ତ୍ରୀଙ୍କ ଗସ୍ତ ସମେତ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ଅଶ୍ୱିନୀ ବୈଷ୍ଣବ, ବିଶ୍ୱେଶ୍ୱର ଟୁଡୁ, ବିଜେଡି ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ ଓ 5T ଏବଂ ନବୀନ ଓଡ଼ିଶା ଅଧ୍ୟକ୍ଷ ଭିକେ ପାଣ୍ଡିଆନ ଅନେକ ଥର ସମ୍ବଲପୁର ଗସ୍ତ କରି ଏଠାର ରାଜନୀତିକୁ ସରଗରମ କରିଛନ୍ତି ।
ବିଗତ 15 ଦିନ ମଧ୍ୟରେ ସମ୍ବଲପୁରକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ 2 ଥର ଆସିଥିବା ବେଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଗତ 3 ତାରିଖରେ ସମ୍ବଲପୁର ଆସି 2ଟି କାର୍ଯ୍ୟକ୍ରମରେ ଯୋଗ ଦେଇଛନ୍ତି । ଏହିଦିନ କେନ୍ଦ୍ରମନ୍ତ୍ରୀ ଅଶ୍ୱିନୀ ବୈଷ୍ଣବ, ଧର୍ମେନ୍ଦ୍ର ପ୍ରଧାନ, ବିଶ୍ୱେଶ୍ଵର ଟୁଡୁ ଓ ରାଜ୍ୟପାଳ ମଧ୍ୟ ସମ୍ବଲପୁର ଆସିଥିଲେ । ତେବେ ଗତ 1 ମାସ ଭିତରେ ରାଜ୍ୟ ବିଜେଡିର ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ ଓ 5T ଅଧ୍ୟକ୍ଷ ଭିକେ ପାଣ୍ଡିଆନ ମଧ୍ୟ ଅନେକ ଥର ସମ୍ବଲପୁର ଗସ୍ତ କରିଛନ୍ତି । ରାଜନୈତିକ ସମୀକ୍ଷକଙ୍କ ମତରେ ସମ୍ବଲପୁର ପଶ୍ଚିମ ଓଡିଶାର ଏକ ପ୍ରମୁଖ ନିର୍ବାଚନ ମଣ୍ଡଳୀ ହୋଇଥିବାରୁ ଏଠାରୁ ଧର୍ମେନ୍ଦ୍ର ପ୍ରଧାନ ପ୍ରାର୍ଥୀ ହୋଇପାରନ୍ତି । ଏଥିପାଇଁ ଏବେ ବିଭିନ୍ନ ଦଳ ଏହି ଆସନକୁ ବିଶେଷ ଗୁରୁତ୍ୱ ଦେଉଛନ୍ତି ।
କେବଳ ଧର୍ମେନ୍ଦ୍ର ନୁହେଁ, କିଛିଦିନ ତଳେ ବିଜେଡି ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ ମଧ୍ୟ ସମ୍ବଲପୁର ଲୋକସଭା ଆସନରୁ ନିର୍ବାଚନ ଲଢ଼ିବେ ବୋଲି ଚର୍ଚ୍ଚା ହେଉଥିଲା । ଏହି ପରିସ୍ଥିତିରେ କିନ୍ତୁ ସମ୍ବଲପୁରକୁ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ବାରମ୍ବାର ଗସ୍ତ ହେଉଛି । କେବଳ ଗସ୍ତ ହେଉନାହିଁ, କେନ୍ଦ୍ରମନ୍ତ୍ରୀ ଛୋଟ ବଡ଼ ସବୁ କାର୍ଯ୍ୟକ୍ରମରେ ଯୋଗ ଦେଉଛନ୍ତି । ଏହା ତାଙ୍କ ନିର୍ବାଚନ ଲଢ଼ିବାକୁ ଖୋରାକ ଯୋଗାଇଛି । ତେବେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ବା ତାଙ୍କ ଦଳ ପକ୍ଷରୁ ଏନେଇ କୌଣସି ସ୍ପଷ୍ଟ କରାଯାଇନାହିଁ । ତେବେ ଗତ 4 ତାରିଖ ଦିନ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଓ ରେଙ୍ଗାଲି ବିଧାୟକ ନାଉରୀ ନାଏକ ସମ୍ବଲପୁର ସହର ଚଷା ସମାଜର ଏକ କାର୍ଯ୍ୟକ୍ରମ ଓ ଭିଏସ୍ଏସ୍ ଷ୍ଟାଡିୟମ୍ରେ ହେଉଥିବା ଏକ କାର୍ଯ୍ୟକ୍ରମରେ ଯୋଗ ଦେଇଥି । ଜଣେ କେନ୍ଦ୍ରମନ୍ତ୍ରୀ ଏହିଭଳି କାର୍ଯ୍ୟକ୍ରମରେ ଯୋଗ ଦେବା ତାଙ୍କର ସମ୍ବଲପୁର ଲୋକସଭା ନିର୍ବାଚନ ମଣ୍ଡଳୀରେ ନିର୍ବାଚନ ଲଢ଼ିବା ନେଇ ସ୍ପଷ୍ଟ କରୁଥିବା ସାଧାରଣରେ ଚର୍ଚ୍ଚା ହେଉଛି ।
ଏନେଇ ରେଙ୍ଗାଲି ବିଧାୟକ ନାଉରୀ ନାଏକ କହିଛନ୍ତି, "ସମ୍ବଲପୁରର ବିଜେପି ନେତୃବୃନ୍ଦ ଚାହୁଁଛନ୍ତି ଯେ ଧର୍ମେନ୍ଦ୍ର ସମ୍ବଲପୁର ଲୋକସଭା ଆସନରୁ ବିଜେପିର ପ୍ରାର୍ଥୀ ହୁଅନ୍ତୁ । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ସମ୍ବଲପୁର ଆସନରୁ ନିର୍ବାଚନ ଲଢ଼ିଲେ ସମ୍ବଲପୁରର ବିକାଶ ହେବ । ବିଜେପିରେ ଦଳର ନିଷ୍ପତ୍ତି ସର୍ବୋପରି । ତେଣୁ ଦଳ ଯେଉଁ ନିଷ୍ପତ୍ତି ନେବ, ସେହି ଅନୁସାରେ କିଏ କେଉଁଠି ନିର୍ବାଚନ ଲଢ଼ିବ ତାହା ସ୍ପଷ୍ଟ ହେବ ।" ଏହିଭଳି ନାଉରୀ ନାଏକ ଧର୍ମେନ୍ଦ୍ରଙ୍କ ସମ୍ବଲପୁର ଲୋକସଭା ସିଟରେ ପ୍ରାର୍ଥୀତ୍ବକୁ ନେଇ ଏକ ପ୍ରକାର ସଂକେତ ଦେଇଛନ୍ତି ।
ଏନେଇ ରାଜନୀତି ସମୀକ୍ଷକଙ୍କ ମତ ହେଲା, "2019ରେ ବିଜେପିର ନୀତେଶ ଗଙ୍ଗଦେବ ସମ୍ବଲପୁର ଆସନରୁ ବିଜୟୀ ହୋଇ ସାଂସଦ ହୋଇଥିଲେ । ସାଂସଦ ହେବା ପରେ ସମ୍ବଲପୁରରେ ତାଙ୍କର ଆଉ ଦେଖାନଥିଲା । ଏହାକୁ ନେଇ ସମ୍ବଲପୁରରେ ବିଜେପି ପ୍ରତି ଜନଅସନ୍ତୋଷ ବୃଦ୍ଧି ପାଉଛି । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ବିଗତ ଗୋଟିଏ ବର୍ଷ ହେଲା ବାରମ୍ବାର ସମ୍ବଲପୁର ଗସ୍ତ କରି ବିଭିନ୍ନ କାର୍ଯ୍ୟକ୍ରମରେ ଯୋଗଦେଇ ବିଜେପିର ଛବି ସଜାଡ଼ିବା ସହ ନିଜର ପ୍ରାର୍ଥୀତ୍ବ ପାଇଁ କ୍ଷେତ୍ର ପ୍ରସ୍ତୁତ କରୁଛନ୍ତି ।"
ଇଟିଭି ଭାରତ, ସମ୍ବଲପୁର
