ଭଦ୍ରକ: ବରିଷ୍ଠ କଂଗ୍ରେସ ନେତା ଅନନ୍ତ ସେଠୀଙ୍କୁ ଭଦ୍ରକ ଲୋକସଭା କଂଗ୍ରେସ ପ୍ରାର୍ଥୀ ଭାବେ ଘୋଷଣା କରାଯାଇଥିବା ବେଳେ, ତାଙ୍କର ପ୍ରାର୍ଥୀତ୍ବକୁ ବିରୋଧ କରିଛନ୍ତି ନିଜ ଦଳର କିଛି ଅସନ୍ତୁଷ୍ଟ କର୍ମୀ । ଏନେଇ ଏକ ସାମ୍ୱାଦିକ ସମ୍ମିଳନୀ ମାଧ୍ୟମରେ ଅସନ୍ତୁଷ୍ଟ କଂଗ୍ରେସ କର୍ମୀମାନେ ଅନନ୍ତ ସେଠୀଙ୍କ ପ୍ରାର୍ଥୀତ୍ବକୁ ତୀବ୍ର ବିରୋଧ କରିବା ସହ ପୁନର୍ବିଚାର କରି ଭଦ୍ରକର ଅନ୍ୟତମ ବରିଷ୍ଠ ନେତା ପଞ୍ଚାନନ ମଣ୍ଡଳଙ୍କୁ ପ୍ରାର୍ଥୀ କରିବା ପାଇଁ ଦାବି କରିଛନ୍ତି ।
ଯଦି ଅନନ୍ତ ସେଠୀଙ୍କ ରାଜନୈତିକ କ୍ୟାରିୟର ଦେଖିବା, 1984 ମସିହା ନିର୍ବାଚନରେ ଭଦ୍ରକ ଲୋକସଭା ଆସନରୁ ବିଜୟୀ ହୋଇଥିବା ବେଳେ, 1989 ଓ 2009 ନିର୍ବାଚନରେ ସାଂସଦ ପ୍ରାର୍ଥୀ ଭାବେ ପରାଜୟ ବରଣ କରିଥଲେ । 1996ରୁ 2002 ଯାଏଁ ରାଜ୍ୟସଭା ସାଂସଦ ମନୋନିତ ହୋଇଥିଲେ । ପରେ 2004 ମସିହାରେ ଭଣ୍ଡାରିପୋଖରୀ ସଂରକ୍ଷିତ ଆସନରୁ କଂଗ୍ରେସ ଦଳରୁ ବିଜୟୀ ହୋଇଥିଲେ । ତେବେ ତାଙ୍କର ଅଭିଜ୍ଞତା ଏବଂ ବରିଷ୍ଠତାକୁ ନେଇ କଂଗ୍ରେସ ଦଳ ତାଙ୍କୁ ପ୍ରାର୍ଥୀ କରିଛି । କିନ୍ତୁ 2024 ନିର୍ବାଚନ ପାଇଁ ତାଙ୍କୁ ଭଦ୍ରକ ଜିଲ୍ଲା ଲୋକସଭା ପ୍ରାର୍ଥୀ କରାଯାଇଥିବା ବେଳେ, ପ୍ରାର୍ଥୀତ୍ବକୁ ତୀବ୍ର ବିରୋଧ କରିବା ସହ ଏକ ସାମ୍ୱାଦିକ ସମ୍ମିଳନୀରେ ପୁନର୍ବିଚାର କରିବା ପାଇଁ ଅସନ୍ତୁଷ୍ଟ କଂଗ୍ରେସ କର୍ମୀମାନେ ଦାବି କରିଛନ୍ତି ।
ତେବେ ଯଦି ପଞ୍ଚାନନ ମଣ୍ଡଳଙ୍କ ରାଜନୈତିକ କ୍ୟାରିୟର ଦେଖିବା,1985 ମସିହାରେ ଭଣ୍ଡାରିପୋଖରୀ ବିଧାନସଭା ନିର୍ବାଚନ ମଣ୍ଡଳୀରୁ ସେ ବିଧାନସଭାକୁ ନିର୍ବାଚିତ ହୋଇଥିଲେ । ଏଥିସହ 1997 ମସିହାରେ ସେ ଭଦ୍ରକ ଜିଲ୍ଲା ପରିଷଦ ଅଧ୍ୟକ୍ଷ ଭାବେ ନିର୍ବାଚିତ ହୋଇଥିଲେ । ତେବେ ସେ 1999 ମସିହାରେ ଭଦ୍ରକ ଲୋକସଭା ନିର୍ବାଚନ ମଣ୍ଡଳୀରୁ କଂଗ୍ରେସ ପ୍ରାର୍ଥୀ ଭାବେ ନିର୍ବାଚନ ଲଢି ବିଜେଡି ପ୍ରାର୍ଥୀ ଅର୍ଜୁନ ସେଠୀଙ୍କ ନିକଟରୁ ପରାଜିତ ହୋଇଥିଲେ । ଏପରି ସ୍ଥଳେ ସେ ପୁଣିଥରେ 2024ରେ ଭଦ୍ରକ ଲୋକସଭା ନିର୍ବାଚନ ମଣ୍ଡଳୀରୁ କଂଗ୍ରେସ ଟିକଟରେ ନିର୍ବାଚନ ଲଢିବା ପାଇଁ ଲବି କରୁଥିଲେ ବୋଲି ସୂଚନା ମିଳିଛି ।
ଯାହାକୁ ନେଇ ଏବେ ଦଳ ମଧ୍ୟରେ ବିବାଦ ସୃଷ୍ଟି ହୋଇଛି । ତେଣୁ ଯଦି ଏହାର ପୁନର୍ବିଚାର କରାଯାଏ ଆଗାମୀ ଦିନରେ ଏହାର ଉଚିତ ଜବାବ୍ ଦିଆଯିବ ବୋଲି ସାମ୍ୱାଦିକ ସମ୍ମିଳନୀରେ ମତ ପ୍ରକାଶ କରିଥଲେ କଂଗ୍ରେସର ଅସନ୍ତୁଷ୍ଟ କର୍ମକର୍ତ୍ତା । ତେବେ ଏନେଇ ଅନନ୍ତ ସେଠୀ କୌଣସି ପ୍ରତିକ୍ରିୟା ପ୍ରକାଶ କରିନାହାଁନ୍ତି ।
ଇଟିଭି ଭାରତ, ଭୁବନେଶ୍ବର
