ସୁବର୍ଣ୍ଣପୁର: ରାଜ୍ୟରେ ପ୍ରଥମ ପର୍ଯ୍ୟାୟ ନିର୍ବାଚନ ଶେଷ ହୋଇଛି । ଆଉ 5 ଦିନ ପରେ ଦ୍ବିତୀୟ ପର୍ଯ୍ୟାୟ ମତଦାନ । ଏଥିପାଇଁ ସୁବର୍ଣ୍ଣପୁର ଜିଲ୍ଲାରେ ଜୋରସୋରରେ ଚାଲିଛି ପ୍ରଚାର । ୩ଟି ପ୍ରମୁଖ ଦଳର ଉଭୟ ଲୋକସଭା ଓ ବିଧାନସଭା ପ୍ରାର୍ଥୀ ନିଜ ସପକ୍ଷରେ ଜନମତ କରିବାକୁ ଆପ୍ରାଣ ଉଦ୍ୟମ କରୁଛନ୍ତି । ଏହି କ୍ରମରେ ବିଜେଡି ଓ ବିଜେପିକୁ ମାତ୍ ଦେବାକୁ ଜୋରସୋରରେ ପ୍ରଚାର ଚଳାଇଛନ୍ତି ବଲାଙ୍ଗୀର ଲୋକସଭା ଆସନର କଂଗ୍ରେସ ପ୍ରାର୍ଥୀ ମନୋଜ ମିଶ୍ର ଓ ସୋନପୁର ବିଧାନସଭା ନିର୍ବାଚନ ମଣ୍ଡଳୀର ପ୍ରାର୍ଥୀ ପ୍ରିୟବ୍ରତ ସାହୁ । ଉଭୟ ପ୍ରାର୍ଥୀ କେନ୍ଦ୍ରରେ କ୍ଷମତାସୀନ ବିଜେପି ସରକାର, ରାଜ୍ୟରେ ବିଜେଡି ସରକାରର ବିଫଳତା ଏବଂ ପୂର୍ବରୁ କଂଗ୍ରେସ ସରକାରର ସଫଳତା ଓ ଆଗାମୀ ଦିନର କାର୍ଯ୍ୟାବଳୀକୁ ନେଇ ଲୋକଙ୍କ ନିକଟତର ହେଉଛନ୍ତି ।
ଗତ 2014 ଓ 2019 ନିର୍ବାଚନରେ ଏହି ଦୁଇ ଲୋକସଭା ଓ ବିଧାନସଭା ଆସନରେ କଂଗ୍ରେସ ତୃତୀୟ ସ୍ଥାନରେ ରହିଥିଲା । 2014 ନିର୍ବାଚନରେ ବଲାଙ୍ଗୀର ଲୋକସଭା ଆସନ ବିଜେଡି ହାତରେ ଥିବାବେଳେ 2019ରେ ବିଜେପି ପ୍ରାର୍ଥୀ ବିଜୟୀ ହୋଇଥିଲେ । ସେହିପରି ସୋନପୁର ଆସନ ଲଗାତର ତିନି ଥର ଧରି ବିଜେଡି କବ୍ଜାରେ ରହିଆସିଛି । ନିର୍ବାଚନ ମଣ୍ଡଳୀ ପୁନଃଗଠନ ପରେ ଚଳିତ ଥରର ବିଜେଡି ପ୍ରାର୍ଥୀ ନିରଞ୍ଜନ ପୂଜାରୀ ୩ ଥର ନିର୍ବାଚିତ ହୋଇଆସିଥିବାବେଳେ ରାଜ୍ୟ କ୍ୟାବିନେଟର ଅନେକ ଗୁରୁତ୍ବପୂର୍ଣ୍ଣ ବିଭାଗରେ ମନ୍ତ୍ରୀ ଭାବେ କାର୍ଯ୍ୟ କରିଛନ୍ତି । ଦୁଇ ଦୁଇ ଥର ରାଜ୍ୟ ବିଧାନସଭା ବାଚସ୍ପତି ଭାବେ ମଧ୍ୟ କାର୍ଯ୍ୟ ସଂପାଦନ କରିଛନ୍ତି ।
ନିରଞ୍ଜନ ପୂଜାରୀ ଜଣେ ପୁରୁଖା ନେତା ଭାବେ ଜିଲ୍ଲାରେ ପରିଚିତ ଥିବାବେଳେ ତାଙ୍କୁ ମାତ୍ ଦେବା ପାଇଁ କଂଗ୍ରେସ ପ୍ରିୟବ୍ରତ ସାହୁଙ୍କୁ ପ୍ରାର୍ଥୀ କରିଛି । ସେପଟେ ବୀରମହାରାଜପୁର ବିଧାନସଭା ଆସନରେ ବିଜୁ ପଟ୍ଟନାୟକ ଓ ନବୀନ ପଟ୍ଟନାୟକଙ୍କ ମନ୍ତ୍ରୀମଣ୍ଡଳରେ କ୍ୟାବିନେଟ ମନ୍ତ୍ରୀ ଭାବେ କାର୍ଯ୍ୟ କରିଥିବା ପଦ୍ମନାଭ ବେହେରା ପୁଣିଥରେ ବିଜେଡିରୁ ପ୍ରାର୍ଥୀ ହୋଇଛନ୍ତି । ବୀରମହାରାଜପୁର ଆସନ ପାଇଁ କଂଗ୍ରେସ ଯୁବନେତା ପ୍ରଦୀପ ସେଠୀଙ୍କୁ ପ୍ରାର୍ଥୀ କରିଛି । ତେବେ ଲଗାତର ଦୁଇଥର ବିଧାନସଭା ଓ ଲୋକସଭା ନିର୍ବାଚନରେ କଂଗ୍ରେସ ତୃତୀୟ ସ୍ଥାନରେ ରହିଥିବା ବେଳେ ଏଥର କିନ୍ତୁ ବିଜେପି ବିଜେଡିକୁ କଡା ଟକ୍କର ଦେବା ପାଇଁ ଜୋରସୋରରେ ଉଦ୍ୟମ କରୁଛି ।
ପ୍ରାର୍ଥୀମାନେ ଗାଁ ଗାଁ ଘର ଘର ବୁଲି ନିଜ ସପକ୍ଷରେ ସମର୍ଥନ ହାସଲ କରିବା ପାଇଁ ପ୍ରୟାସ ଜାରି ରଖିଛନ୍ତି । କଂଗ୍ରେସ ପ୍ରାର୍ଥୀଙ୍କ ଧୂଆଁଧାର ନିର୍ବାଚନୀ ପ୍ରଚାର ଯୋଗୁଁ ଏଥର ତ୍ରିମୁଖୀ ଲଢେଇ ହେଉଥିବା ଜନସାଧାରଣରେ ଚର୍ଚ୍ଚା ହେଉଛି ।
ଇଟିଭି ଭାରତ, ସୁବର୍ଣ୍ଣପୁର
