ଚେନ୍ନାଇ: ପ୍ରଧାନମନ୍ତ୍ରୀଙ୍କ ରୋଡ୍ ଶୋ'କୁ ଅନୁମତି ଦେଲେ ମାଡ୍ରାସ ହାଇକୋର୍ଟ । ଆସନ୍ତା ୧୮ ତାରିଖରେ ତାମିଲନାଡୁର କୋଏମ୍ବାଟୁରରେ ହେବ ବିଶାଳ ରାଲି। ଏଥିପାଇଁ ଜିଲ୍ଲା ପୋଲିସଠୁ ଅନୁମତି ଲୋଡିଥିଲା ଭାରତୀୟ ଜନତା ପାର୍ଟି । ହେଲେ ବିଭିନ୍ନ କାରଣ ଦର୍ଶାଇ ଅନୁମତି ଦେବାକୁ ମନା କରିଥିଲା ଜିଲ୍ଲା ପୋଲିସ । କୋଏମ୍ବାଟୁରର ସାମ୍ପ୍ରଦାୟିକ ଇତିହାସ ଦୃଷ୍ଟିରୁ ଅନୁମତି ଦିଆଯିବ ନାହିଁ ଜିଲ୍ଲା ପୋଲିସ କାରଣ ଦର୍ଶାଇଥିଲା । ଏହାସହ ରୋଡ୍ ଶୋ' କାରଣରୁ ସାଧାରଣ ଜନତାଙ୍କ ସମେତ ଛାତ୍ରଛାତ୍ରୀମାନେ ବିଶେଷ ଭାବେ ପ୍ରଭାବିତ ହେବେ ବୋଲି ଆଶଙ୍କା ରହିଥିବା କହିଥିଲା ଜିଲ୍ଲା ପୋଲିସ।
ଏପରିକି ଆସନ୍ତା ୧୮ ଓ ୧୯ ତାରିଖରେ ବୋର୍ଡ ପରୀକ୍ଷା ଥିବାରୁ ଛାତ୍ରଛାତ୍ରୀଙ୍କ ଗମନାଗମନରେ ବାଧା ସୃଷ୍ଟି ହେବ ବୋଲି ଜିଲ୍ଲା ପୋଲିସ ପକ୍ଷରୁ କୁହାଯାଇଥିଲା । ଗୋଟିଏପଟେ ଛାତ୍ରଛାତ୍ରୀଙ୍କ ପରୀକ୍ଷା ଥିବାବେଳେ ଅନ୍ୟପଟେ ଏହି ୪ କିଲୋମିଟରର ରୋଡ୍ ଶୋ' ଯୋଗୁ ପିଲାମାନେ ନାହିଁ ନଥିବା ଅସୁବିଧାର ସମ୍ମୁଖୀନ ହେବାର ଆଶଙ୍କା ରହିଥିଲା । ଏସବୁ କାରଣ ଦର୍ଶାଇ ଅନୁମତି ଦେବାକୁ ମନା କରିଦେଇଥିଲେ ପୋଲିସ ଅଧିକାରୀ ।
ଏହା ମଧ୍ୟ ପଢନ୍ତୁ...ତାମିଲନାଡୁରେ ଗର୍ଜିଲେ ମୋଦି, 'ଡିଏମକେ-କଂଗ୍ରେସର ଦୁର୍ନୀତି ସୂଚୀ ଲମ୍ବା'
ତାମିଲନାଡୁ ପୋଲିସ ଏହି ରୋଡ୍ ଶୋ'କୁ ଅନୁମତି ଦେବାକୁ ମନା କରିଥିବାବେଳେ ମାଡ୍ରାସ ହାଇକୋର୍ଟଙ୍କ ଦ୍ବାରସ୍ଥ ହୋଇଥିଲା ରାଜ୍ୟ ବିଜେପି । ଏହି ମାମଲାର ଶୁଣାଣି କରି ଜଷ୍ଟିସ ଏନ ଆନନ୍ଦ ଭେଙ୍କଟେଶ ଭାଜପା ସମର୍ଥନରେ ରାୟ ଶୁଣାଇଛନ୍ତି । ଶେଷରେ ପ୍ରଧାନମନ୍ତ୍ରୀଙ୍କ ଏହି ରୋଡ୍ ଶୋ'କୁ ମିଳିଛି ଅନୁମତି । ପ୍ରାୟ ୪ କିଲୋମିଟର ଧରି ବିଜେପି ନେତା ଓ ସମର୍ଥକମାନେ ଶୋଭାଯାତ୍ରାରେ ଯିବାର କାର୍ଯ୍ୟକ୍ରମ ରହିଛି ।
ସୂଚନା ଅନୁସାରେ, ୧୯୮୮ ମସିହାରେ କୋଏମ୍ବାଟୁର ଯେଉଁ ଅଞ୍ଚଳରେ ବୋମା ବିସ୍ଫୋରଣ ହୋଇଥିଲା ସେହିଠାରେ ହିଁ ହେବ ଏହି ରୋଡ୍ ଶୋ' । ଏହି ବିସ୍ଫୋରଣରେ ୫୮ ଲୋକଙ୍କ ମୃତ୍ୟୁ ହୋଇଥିବାବେଳେ ୨୦୦ରୁ ଉର୍ଦ୍ଧ୍ବ ଲୋକେ ଆହତ ହୋଇଥିଲେ । ଏହାକୁ ନଜରରେ ରଖି ସମ୍ପୃକ୍ତ ଅଞ୍ଚଳ ବମ୍ ଡିଟଟେକ୍ସନ ଆଣ୍ଡ ଡିଫ୍ୟୁଜାଲ୍ ସ୍କ୍ବାଡ୍ (BDDS) ଦ୍ବାରା ତଦାରଖ କରାଯିବ । ସ୍ପେଶାଲ ପ୍ରୋଟେକ୍ସନ ଗ୍ରୁପ (SPG) ସହ Z+ ସୁରକ୍ଷା ଦିଆଯିବ । ତେବେ ବିଜେପି ସପକ୍ଷରେ ରାୟ ଆସିବା ପରେ ଦଳୀୟ କର୍ମକର୍ତ୍ତାଙ୍କ ମଧ୍ୟରେ ଖୁସିର ଲହରୀ ଖେଳିଯାଇଛି ।
