पुणे: राज्य उत्पादन शुल्क यांना मिळालेल्या गोपनीय बातमीच्या अनुषंगाने राज्य उत्पादन शुल्क सासवड विभाग, पुणे या पथकाने गोवा राज्यात विक्रीकरिता असलेल्या मद्यावर धडक कारवाई केली. गोवा राज्य निर्मित मद्याची अवैधरीत्या मोठ्या प्रमाणावर आवक केली जाते. त्या अनुषंगाने राज्य उत्पादन शुल्क सासवड विभाग पुणे या पथकाने मोहीम राबविली. दरम्यान पुणे जिल्ह्यातील मुळशी तालुक्यातील मौजे माले गावच्या हद्दीत हॉटेल लाल मिर्चच्या समोर पुणे-माणगाव हायवे रोडवर संशयित ट्रकांची तपासणी सुरू केली. यावेळी वाहन क्र. एमएच. ०४ ईएल. ४८४७ या ट्रकमधील मालावर अधिकाऱ्यांना संशय आला. संबंधित ट्रकचालकास याविषयी विचारले असता त्याने ट्रकमध्ये औषधे व इंजक्शन असल्याचे सांगितले; परंतु त्याने संशयित उत्तरे दिल्याने ट्रक बाजूला थांबवून कठोर तपासणी करण्यात आली. यावेळी वाहनामध्ये औषधांऐवजी बेकायदेशीर मद्यसाठा असल्याचे आढळून आले.
57 लाखांचा अवैध मद्यसाठा जप्त: या कारवाईत वाहनामध्ये गोवा राज्य निर्मित व विक्रीसाठी असलेल्या विविध कंपन्यांच्या सीलबंद बाटल्या जप्त करण्यात आल्या. मुद्देमालाची एकूण किंमत ५७ लाख २५ हजार ५२० रुपये आहे. उल्लेखनीय म्हणजे, वाहन चालकाकडे मद्य वास्तुकेच्या संदर्भातील कोणताही वाहतुक पास, परवाने अथवा कोणतीही कागदपत्रे मिळून आली नाहीत. या कारवाईने मद्यमाफियांचे धाबे दणाणले आहेत.
अवैध दारूसाठा जप्त: लातूर तालुक्यातील उदगीर ग्रामीण पोलिसांच्या पथकाने डिसेंबर, 2019 मध्ये दोन लाखांचा अवैध दारूसाठा जप्त केला होता. या कारवाईत अवैध दारूच्या वाहतुकीसाठी वापरण्यात आलेल्या टेम्पोसह ४ लाख २४ हजारांचा मुद्देमाल पोलिसांनी ताब्यात घेतला आहे.
अशी केली कारवाई: व्यंकटराव पाटील हे टम्पोतून अवैध दारूची वाहतूक करत असल्याची माहिती पोलिसांना मिळाली होती. त्यानुसार पोलिसांनी एम.एच.१३ सी.यु.०४२८ या वाहनाचा पाठलाग करत देवर्जन-हनुमंतवाडी पाटी परिसरात हा दारुसाठा जप्त केला. सुरुवातीला पोलिसांनी संबंधितांवर कारवाई करण्यास टाळाटाळ केली. मात्र, या प्रकरणाचा तालुक्यात गाजावाजा होताच पोलिसांना कारवाई करावी लागली. परिसरात पोलिसांच्या या अजब वर्तणुकीची चर्चा सुरू आहे. मारोती घोडके यांच्या तक्रारीवरून याप्रकरणी गुन्हा नोंदवण्यात आला आहे.
हेही वाचा: Vajramuth Sabha : महाविकास आघाडीची पुण्यातील वज्रमूठ सभेचा मुहूर्त चुकणार
