টংলা, 5 আগষ্ট : দেওবাৰে নিশা 12 মান বজাত উত্তৰ-পূৱ সীমান্ত ৰে’লৱেৰ ৰঙিয়া ৰে’ল ডিভিজনৰ অন্তৰ্গত টংলা ষ্টেচনৰ নিকটৱৰ্তী চমুৱাপাৰা গাঁৱৰ এটা পুৰণি উন্মুক্ত লেভেল ক্ৰ’ছিঙ বন্ধ কৰিবলৈ গৈ বিপদত পৰিল ৰেল বিভাগ ৷ ৰে’লৱে বিষয়া-কৰ্মচাৰীয়ে ৰে’ল আৰক্ষীৰ এটি বৃহৎ দলে অতি গোপনে ক্ৰছিংটো বন্ধ কৰিবলৈ বিচৰাত স্থানীয় ৰাইজৰ সৈতে সংঘাতৰ সৃষ্টি হয় ৷ পাছত ৰাইজৰ ৰুদ্ৰ মূৰ্তি ধাৰণ কৰাত পলায়ন কৰিবলৈ বাধ্য হয় ৰেল বিভাগৰ দলটো ৷ ইফালে সোমবাৰে পুৱা গাঁৱখনৰ শতাধিক লোকে ৰেল বিভাগৰ উক্ত কাৰ্যৰ তীব্ৰ বিৰোধিতাৰে উত্তাল প্ৰতিবাদ সাব্যস্ত কৰে ৷ উল্লেখযোগ্য যে হৰিশিঙা ৰাজহ চক্ৰৰ অন্তৰ্গত চমুৱাপাৰা গাঁৱৰ ধূপতল, পুখুৰীপাৰা, বানশেৰীয়াকে ধৰি আন কেইবাখনো গাঁৱৰ অহা-যোৱা কৰাৰ এইটোৱেই মূল পথ যদি ইয়াত থকা এই লেভেল ক্ৰ’ছিংটো বন্ধ কৰি দিয়া হয় তেন্তে গাঁওকেইখনৰ ৰাইজৰ টংলা নগৰকে ধৰি আন ঠাইৰ সৈতে পোনপটীয়া পথ যোগাযোগ ব্যাহত হব, ইয়াৰ উপৰিও জৰুৰীকালীন পৰিস্থিতিত অঞ্চলটোলৈ তৎকালীনভাৱে এম্বুলেন্স, অগ্নিনিৰ্বাপক বাহিনী, আৰক্ষী আদি অহা-যোৱা কৰাৰ কোনো বিকল্প পথ নাথাকিব ৷
ৰঙিয়া-ৰাঙাপাৰা জংচনৰ মাজৰ চমুৱাপাৰা গাঁৱৰ এই উন্মুক্ত ৰে’লৱে ক্ৰ’ছিঙটোত স্থায়ী লেভেল ক্ৰ’ছিং স্থাপন কৰি গে’ট নিৰ্মাণৰ বাবে ৰাইজে দীৰ্ঘদিন ধৰি দাবী জনাই অহাৰ লগতে ৰঙিয়া ৰে’ল ডিভিজন কাৰ্যালয়ত কেইবাবাৰো স্মাৰকপত্ৰ প্ৰদান কৰিছে ৷ বিভাগটোৱে ৰাইজক কেইবাবাৰো উক্ত স্থানত ৰখীয়াসহ গে’ট নিৰ্মাণৰ আশ্বাস প্ৰদান কৰিছিল কিন্তু নিশা এনেদৰে লেভেল ক্ৰ’ছিংটো অবৈধ বুলি ঘোষণা কৰি ৰেল বিভাগে বন্ধ কৰাৰ চেষ্টা কৰাত জাঙুৰ খাই উঠে স্থানীয় ৰাইজ ৷ কোনো কাৰণতেই এই লেভেল ক্ৰ’ছিং বন্ধ কৰিবলৈ দিয়া নহ’ব বুলি ৰাইজে স্পষ্ট কৰি দিয়ে ৷