ওদালগুৰি, 7 নৱেম্বৰঃ ৰাজ্যত বন্যজন্তু আৰু মানুহৰ মাজত সংঘাতে তীব্ৰ ৰূপ ধাৰণ কৰাৰ সময়তে বন বিভাগৰ বিৰুদ্ধে গুৰুতৰ অভিযোগ উত্থাপন কৰিছে একাংশ কৃষকে ৷ ওদালগুৰি জিলাৰ সমীপৰ বৰছলাৰ একাংশ কৃষকে ওৰাং ৰাষ্ট্ৰীয় উদ্যান কৰ্তৃপক্ষৰ বিৰুদ্ধে উত্থাপন কৰিছে এই অভিযোগ ৷ উদ্যানখনৰ পোহনীয়া হাতীয়ে অঞ্চলটোৰ বহু বিঘা মাটিৰ শাক-পাচলিৰ লগতে ধান খেতি নষ্ট কৰাৰ অভিযোগ উত্থাপন কৰিছে কৃষকসকলে ৷
বৰছলাৰ নিছলামাৰি গাঁৱত ইতিপূৰ্বেও বনৰীয়া হাতী আৰু ম'হে কৃষিভূমি নষ্ট কৰি আহিছে যদিও বেংকৰ পৰা ঋণ লৈ হ'লেও কৃষকসকলে খেতি কৰি আহিছে ৷ এনে অৱস্থাত ওৰাং ৰাষ্ট্ৰীয় উদ্যানে নিশা হ'লেই নিজৰ পোহনীয়া অৰ্থাৎ চৰকাৰী হাতীসমূহ মুকলি কৰি দিয়ে ৷ সন্ধিয়া হ'লেই ৰাষ্ট্ৰীয় উদ্যানখনৰ হাতীয়ে কৃষকসকলৰ খেতিত প্ৰৱেশ কৰি এফালৰ পৰা নষ্ট কৰে শাক-পাচলিকে ধৰি ধানৰ খেতি ৷ প্ৰথম অৱস্থাত এয়া বনৰীয়া হাতী আৰু ম'হৰ কাণ্ড বুলি ভাবিছিল যদিও পৰৱৰ্তী সময়ত কৃষকসকলে শিকলি লগাই থোৱা হাতী প্ৰত্যক্ষ কৰি এয়া ওৰাং ৰাষ্ট্ৰীয় উদ্যানৰ পোহনীয়া হাতী বুলি নিশ্চিত হয় ৷ ঘটনা সন্দৰ্ভত ৰাষ্ট্ৰীয় উদ্যান কৰ্তৃপক্ষক বাৰম্বাৰ জনোৱাৰ পিচটো ব্যৱস্থা গ্ৰহণ কৰাৰ পৰিৱৰ্তে এয়া বনৰীয়া হাতীৰেই কাম বুলি দায়সৰা মন্তব্য কৰি আহিছে ওৰাং ৰাষ্ট্ৰীয় উদ্যান কৰ্তৃপক্ষই ৷
লগতে চাওকঃমাইক্ৰ' ফাইনেন্স কোম্পানীৰ সপক্ষে দুই শতাধিক মহিলা
