ৰঙাপৰা, 14 মে’ : ৰঙাপৰাৰ একমাত্ৰ বালিকা বিদ্যালয়খনলৈ নামি আহিছে সংকট । ৰঙাপৰাৰ একমাত্ৰ বালিকা বিদ্যালয়খনলৈ যোৱা একমাত্ৰ পথচোৱা সম্প্ৰতি গৰাখহনীয়াৰ কবলত পৰিছে (Erosion at Rangapara) । নেৰানেপেৰা বৰষুণৰ ফলত বিদ্যালয়খনলৈ যোৱা পথচোৱাৰ মাজৰ কিছু অংশৰ মাটি খহাই লৈ যায় বৰষুণৰ পানীয়ে ।
পথচোৱাৰ মাটি খহাই নিয়াত বিদ্যালয়খনৰ ছাত্ৰীসকলে বিপদ সংকুলভাৱে অহা-যোৱা কৰিবলগীয়া হৈছে । বৰ্তমান খহনীয়াৰ ঠাইখিনিত শিক্ষকসকলে এখন তক্তা পাৰি অহা যোৱাৰ ব্যৱস্থা কৰি দিছে । যদি কিবা কাৰণত তক্তাৰ ওপৰেদি পাৰ হৈ যোৱাৰ সময়ত কোনো ছাত্ৰী ভৰি পিছল খাই পৰে, তেতিয়া হ’লে ছাত্ৰীগৰাকী পথচোৱাৰ নিচেই কাষেৰে বৈ যোৱা পাহিজুৰি নৈখনৰ বুকুত পৰিব ।
আনহাতে, বিদ্যালয়খনৰ একাংশ ভূমি ইতিমধ্যে পাহিজুলি নৈখনৰ (Pahijuli river ay Rangapara) বুকুত জাহ যোৱাৰ উপক্ৰম হৈছে ৷
ফলত বালিকা বিদ্যালয়খনলৈ যোৱা একমাত্ৰ পথটি ক্ৰমান্বয়ে নিশ্চিহ্ন হোৱাৰ দিশে গতি কৰিছে । সেয়ে বিদ্যালয়খনৰ পথচোৱা মেৰামতি কৰি দিয়াৰ লগতে গৰাখহনীয়া প্ৰতিৰোধ ব্যৱস্থা কৰি দিবলৈ স্থানীয় বিধায়কগৰাকীক আহ্বান জনাইছে বিদ্যালয়খন শিক্ষকসকলে ৷
পথচোৱা যদি খহনীয়াৰ কবলত পৰি নিশ্চিহ্ন হৈ যায়, তেতিয়া হ’লে ৰঙাপৰাৰ একমাত্ৰ বালিকা বিদ্যালয়খন এদিন বন্ধ হৈ পৰিব সেয়া নিশ্চিত ।
লগতে পঢ়ক : পানী এৰিলে কাৰ্বি লাংপি জলবিদ্যুৎ প্ৰকল্পৰ কৰ্তৃপক্ষই
