তেজপুৰ,২৬ মে': ৰাজ্যত অব্যাহত আছে চোৰাং চিকাৰীৰ কাৰ্যকলাপ । ইয়াৰ মাজতে শোণিতপুৰ জিলাৰ অন্তৰ্গত সোণাই ৰূপাই অভয়াৰণ্যত বনৰক্ষী আৰু চোৰাং চিকাৰীৰ মাজত গুলীচালনাৰ ঘটনা সংঘটিত হোৱাৰ কথা পোহৰলৈ আহিছে । তথ্য অনুসৰি যোৱা ২৩ মে'ৰ নিশা বন বিভাগৰ ৰেঞ্জ বিষয়া বিভূতি মজুমদাৰ নেতৃত্বত যোৱা এটা তাহলদাৰী দলৰ ওপৰত লক্ষ্য কৰি চিকাৰীৰ এটা দলে গুলীবৰ্ষণ কৰে ।
তাৰ পিছত বন কৰ্মীৰ দলটোৱে প্ৰত্যুত্তৰত দুই জাঁই গুলীবর্ষণ কৰে । বন কৰ্মীয়ে পিছত উক্ত অঞ্চলৰ পৰা দুটা হস্ত নিৰ্মিত বন্দুক, দুই জাঁই সজীৱ গুলী এক বাকচ গুলী নিৰ্মাণ কৰা পদাৰ্থৰ লগতে বহুতো সামগ্ৰী উদ্ধাৰ কৰে । উল্লেখ্য যে বনাঞ্চলখনত ইয়াৰ পূৰ্বে বহুকেইটা চোৰাং চিকাৰী আটক কৰা হৈছে আৰু অস্ত্ৰ উদ্ধাৰ কৰিবলৈ সক্ষম হৈছিল ।
