তেজপুৰ,১৬ নৱেম্বৰ: দেশৰ ৰাজধানী নতুন দিল্লীত অনুষ্ঠিত হোৱা ৪২ সংখ্যক ভাৰত আন্তঃৰাষ্ট্ৰীয় বাণিজ্য মেলাত জিলিকিল চুবুৰীয়া ৰাজ্য অৰুণাচল প্ৰদেশৰ GI টেগ লাভ কৰা তিনিবিধ সামগ্ৰী । GI টেগ লাভ কৰা খামতি চাউল, য়াক চুৰ্পি আৰু টাংছা জনগোষ্ঠীয় বস্ত্ৰই স্থান লাভ কৰিছে । ভাৰতীয় বাণিজ্য প্ৰসাৰ সংস্থাৰ উদ্যোগত ১৪ নৱেম্বৰৰপৰা ২৭ নৱেম্বৰলৈ নতুন দিল্লীৰ প্ৰগতি মৈদানত আয়োজিত ৪২ সংখ্যক ভাৰত আন্তঃৰাষ্ট্ৰীয় বাণিজ্য মেলাত এই সামগ্ৰীসমূহে স্থান লাভ কৰিছে । ভাৰত আন্তঃৰাষ্ট্ৰীয় বাণিজ্য মেলা ২০২৩ ৰ মূল বিষয়বস্তু হৈছে 'বসুধৈৱ কুটুম্বকম' ।
উল্লেখ্য যে অৰুণাচল প্ৰদেশৰ প্ৰথম GI টেগ লাভ কৰা খাদ্য সামগ্ৰী হৈছে খামতি চাউল আৰু য়াকৰ গাখীৰৰ পৰা নিৰ্মিত চুৰ্পি । খামতি চাউল হৈছে আঠাযুক্ত চাউলৰ এক প্ৰজাতি ৷ বিশেষকৈ অৰুণাচল প্ৰদেশৰ নামচাই অঞ্চলত ইয়াৰ যথেষ্ট পৰিমাণৰ খেতি কৰে খামতি জনজাতীয় কৃষকে । এই চাউল অনান্য বিভিন্ন পৰম্পৰাগত সুস্বাদু খাদ্য প্ৰস্তুত কৰিবলৈও ব্যৱহাৰ কৰে স্থানীয় লোকসকলে ৷
আনহাতে, অৰুণাচল প্ৰদেশৰ য়াক চুৰ্পি কটেজ চিজৰ দৰে এক সামগ্ৰী ৷ এইবিধ সামগ্ৰী কেঁচা স্কিমড আৰু ফাৰ্মেণ্টেড য়াকৰ গাখীৰৰ পৰা প্ৰস্তুত কৰা হয় ৷ অৰুণাচলী য়াকৰ গাখীৰৰ পৰা প্ৰস্তুত কৰা হয় এইবিধ সামগ্ৰী ৷ সমাজত ইয়াৰ স্বকীয়তা আৰু সম্ভাৱনা, অৰ্থনৈতিক উত্থানৰ লগতে দূৰদৰ্শী পথ প্ৰদৰ্শনৰ ক্ষেত্ৰত সঞ্চালক ড৹ মিহিৰ চৰকাৰে লৈছিল উল্লেখযোগ্য ভূমিকা ৷ মিহিৰ চৰকাৰৰ তৎপৰতাৰ বাবেই য়াক চুৰ্পিয়ে GI টেগ লাভ কৰিবলৈ সক্ষম হয় ।
আনহাতে GI টেগ লাভ কৰা আৰু বজাৰত যথেষ্ট সমাদৰ লাভ কৰা টাংছা বস্ত্ৰশিল্প হৈছে চাংলাঙৰ টাংছা জনগোষ্ঠীৰ এক পৰম্পৰাগত বস্ত্ৰ । ৪২ সংখ্যক ভাৰত আন্তঃৰাষ্ট্ৰীয় বাণিজ্য মেলাত এই টাংছা বস্ত্ৰই লাভ কৰিছে বিশেষ সমাদৰ ।
লগতে পঢ়ক: Hospital inauguration in Nalbari: নলবাৰীত ১১০ খন বিচনাযুক্ত শ্বহীদ মুকুন্দ কাকতি হাস্পতাল উদ্বোধন
