শিৱসাগৰ, 17 জুলাই: দিখৌ নদীৰ বাঢ়নী পানীয়ে হাহাকাৰ লগাইছে শিৱসাগৰত ৷ বিভিন্ন ঠাইত বাগৰিছে নদীৰ বাঢ়নী পানী ৷ বন্যাৰ্তৰ বাবে স্থাপন কৰা হৈছে আশ্ৰয় শিৱিৰ ৷ পৰিস্থিতিৰ বুজ লৈছে শিৱসাগৰ সমষ্টিৰ বিধায়ক অখিল গগৈয়ে ৷
ক্ৰমে বৃদ্ধি পাই অহা জলস্তৰৰ ফলত শিৱসাগৰৰ দিখৌ, দিচাং, দৰিকা আদি নদীয়ে এক হাহাকাৰ অৱস্থাৰ সৃষ্টি কৰিছে ৷ বিশেষকৈ দিখৌ নদীয়ে নৈপৰীয়া ৰাইজৰ চকুৰ টোপনি কাঢ়িছে ৷ শিৱসাগৰ নগৰৰ ন-পাম গাঁও দিখৌ নদীৰ বাঢ়নী পানীত ইতিমধ্যে ডুব গৈছে ৷ শালমৰীয়াত এতিয়াও পথৰ ওপৰেদি বাগৰি আছে পানী ৷
আনহাতে সোমবাৰে পুৱাৰে পৰা কোঁৱৰপুৰৰ বলিয়াঘাট সংযোগী পথৰ ওপৰেদি তীব্ৰ গতিত দিখৌ নদীৰ পানী বাগৰিব ধৰিছে ৷ ক্ৰমে বৃদ্ধি হৈ থকা জলস্তৰৰ বাবে বিপদৰ আশংকা প্ৰকাশ কৰা হৈছে এই অঞ্চলত ৷ অৱশ্যে জল সম্পদ বিভাগে প্ৰদান কৰা তথ্য অনুসৰি দেওবাৰৰ নিশাৰ পৰা স্থিৰ হৈছে দিখৌ নদীৰ পানী ৷ তথাপিও দিখৌ নদীৰ পানী এতিয়াও বিপদ সীমাৰ ওপৰেদি বৈ আছে ৷
নাজিৰাত দিখৌ নদী বিপদ সীমাৰ 98.20 মিটাৰ ওপৰেদি আৰু শিৱসাগৰত 94.95 মিটাৰ ওপৰত বৈ আছে ৷ ইফালে বিধায়ক অখিল গগৈয়ে সোমবাৰে নপাম গাঁৱৰ বান পৰিস্থিতিৰ বুজ লয় ৷ তেওঁ বানত ডুব যোৱা অঞ্চল সমূহ পৰিভ্ৰমণ কৰাৰ লগতে স্থানীয় ফুকন নগৰ প্ৰাথমিক বিদ্যালয়ত স্থাপন কৰা আশ্ৰয় শিৱিৰ পৰিদৰ্শন কৰে ৷
বিধায়কজনে কয় যে, শিৱসাগৰ নগৰৰ 1, 10 আৰু 14 নম্বৰ ৱাৰ্ডত ব্যাপক ৰূপত পানী উঠিছে ৷ ফলত কেইবাটাও সাহাৰ্য শিবিৰ স্থাপন কৰিব লগীয়া হৈছে ৷ দেওবাৰে নিশাৰ পৰা এই সাহাৰ্য শিবিৰ সমূহ আৰম্ভ কৰা হৈছে বুলি জানিবলৈ দিয়ে বিধায়কজনে ৷ ইতিমধ্যে বানাক্ৰান্ত অঞ্চল সমূহত NDRF আৰু SDRFৰ দল নিয়োগ কৰাৰ বাবে ব্যৱস্থা গ্ৰহণ কৰা হৈছে বুলি জানিবলৈ দিয়ে বিধায়ক অখিল গগৈয়ে ৷
