নলবাৰী, 3 জুন: ৰাজ্যৰ শাসনত নতুন চৰকাৰ অধিষ্ঠিত হোৱাৰ পিছৰে পৰা ক্ৰমাগতভাৱে অবৈধ নিচাযুক্ত দ্ৰব্যৰ বেহা-বেপাৰ কৰা লোক সকলৰ বিৰুদ্ধে অধিক শক্তিশালী ৰূপ লৈছে অসম আৰক্ষীয়ে ৷ বিশেষকৈ ড্ৰাগছৰ বিৰুদ্ধে শদিয়াৰ পৰা ধুবুৰীলৈ ক্ৰমাগত অভিযান চলাইছে অসম আৰক্ষীয়ে ৷ আৰক্ষীৰ দৃষ্টি নিবদ্ধ আছে ড্ৰাগছ সৰবৰাহকাৰীৰ লগতে সকলো ধৰণৰ ক্ৰেতা বিক্ৰেতাৰ ওপৰত ৷
ইয়াৰ মাজতে বৃহস্পতিবাৰে নলবাৰীৰ চামতাত ড্ৰাগছ সহ আৰক্ষীৰ জালত পৰি আটক হ’ল এজন ড্ৰাগছ সৰবৰাহকাৰী ৷ ধৃত ড্ৰাগছ সৰবৰাহকাৰী জন নলবাৰী জিলাৰ জোৱাদ্দিৰৰ নৱজিৎ কলিতা বুলি জানিব পৰা গৈছে ৷ উল্লেখ্য যে, বাইকৰে ৪ টাকৈ ব্ৰাউন চুগাৰৰ কন্টেইনাৰ লৈ আহি থাকোতে চামতাত আৰক্ষীয়ে আটক কৰে নৱজিতক ৷
উল্লেখযোগ্য যে, বেলশৰ আৰক্ষীয়ে গোপন সূত্ৰৰ ভিত্তিত আটক কৰে ড্ৰাগছ সৰবৰাহকাৰী নৱজিতক ৷ আৰক্ষীৰ সূত্ৰ অনুসৰি জব্দ হোৱা ব্ৰাউন চুগাৰখিনিৰ ওজন ৭.৬ গ্ৰাম ৷ সম্প্ৰতি, এই ঘটনাৰ সৈতে জড়িত চক্ৰটোৰ তথ্যৰ সন্ধানত বেলশৰ আৰক্ষীয়ে ড্ৰাগছ সৰবৰাহকাৰী নৱজিতক জেৰা অব্যাহত ৰাখিছে ৷
লগতে পঢ়ক: চিকিৎসক নিগ্ৰহ কাণ্ডৰ তদন্তৰ দায়িত্ব অৰ্পন বিবেকানন্দ দাসক
