ঢকুৱাখনা,5 এপ্ৰিলঃ মুগা পালনৰ লগত জড়িত ঢকুৱাখনাৰ ৯০ শতাংশ লোক ৷ মুগা পালন কৰিয়েই পৰিয়ালৰ পোহ-পাল দিয়ে অঞ্চলটোৰ বিভিন্ন লোকে ৷ সেয়ে বসন্তৰ ন কুঁহিপাতে এই সকল মুগা পালকক দিয়ে আশাৰ বতৰা । চোম,সোৱালু,বনচোম,পাতিসুন্দা আদি গছত ওলোৱা ন-কুঁহিপাত এই মুগা পলুৰ অন্যতম খাদ্য ৷
মুগা পালন
গতিকে গছ-বিৰিখত ন-কুঁহিপাত মেলাৰ লগেই-লগেই আৰম্ভ হয় কৃষকৰ মুগা পালন ৷ বসন্ততে পালন কৰা হয় বাণিজ্যকৰণৰ বাবে পালন কৰা জেঠুৱা মুগা। ইয়াৰ পিছতে পৰ্যায় ক্ৰমে পালন কৰা হয় এহেৰুৱা, ভদিয়া, কটীয়া ,জাওৰুৱা আদি । ইয়াৰে জেঠুৱা আৰু কটীয়া মুগা বাণিজ্যকৰণৰ বাবে পালন কৰাৰ বিপৰীতে বাকী এহেৰুৱা, ভদিয়া, আৰু জাওঁৰুৱা পালন কৰা হয় সঁচৰ বাবে। সেয়ে এই বসন্তৰ বতৰা পাই ঢকুৱাখনা কৃষকে মুগা চোমনিত ব্যস্ততাৰে আৰম্ভ কৰিছে মুগা পালন প্ৰক্ৰিয়া ।
