কোকৰাঝাৰ, 12 অক্টোবৰ : শাৰদীয় দুৰ্গোৎসৱ আৰু কোকৰাঝাৰ জিলাৰ গোঁসাইগাঁও সমষ্টিৰ উপ নিৰ্বাচনক লক্ষ্য কৰি কোকৰাঝাৰ চহৰত সোমবাৰে অসম আৰক্ষীয়ে এক পদযাত্ৰা উলিয়ায় ৷ জনতাৰ মাজত নিৰাপত্তাৰ আস্থা আৰু ভৰষা দিবলৈ আৰক্ষীয়ে এই পদযাত্ৰা কাৰ্যসূচী গ্ৰহণ কৰে ৷
উল্লেখ্য যে, কোকৰাঝাৰ জিলাত দুৰ্গোৎসৱৰ লগতে ২৮ নং গোঁসাইগাঁও সমষ্টি উপ নিৰ্বাচন দুয়োটাতে যাতে কোনো দুষ্টচক্ৰ বা অপৰাধীয়ে কূটাঘাতমূলক কাৰ্যৰে সমাজত শান্তি-সম্প্ৰীতি বিনষ্ট কৰিব নোৱাৰে, তাৰে বাৰ্তা দিবলৈ তথা ৰাইজক নিৰাপত্তাৰ আস্থা দিবলৈ আৰক্ষীয়ে এই পদযাত্ৰা কাৰ্যসূচী হাতত লোৱা বুলি সদৰী কৰে জিলা আৰক্ষী অধীক্ষক প্ৰতীক বিজয় কুমাৰ থুৱেয়ে ৷
কোকৰাঝাৰ জিলা সদৰ থানাৰ পৰা উলিওৱা এই পদযাত্ৰা কাৰ্যসূচীক নেতৃত্ব দি আৰক্ষী অধীক্ষকগৰাকীয়ে ৩০ অক্টোবৰত অনুষ্ঠিত হ’বলগীয়া গোঁসাইগাঁও সমষ্টিৰ উপ নিৰ্বাচন শান্তিপূৰ্ণ আৰু মুক্ত নিৰ্বাচন হ’ব বুলি উল্লেখ কৰে ৷ তেওঁ লগতে নিৰাপত্তাৰ সকলো যাৱতীয়া ব্যৱস্থা গ্ৰহণ কৰা হৈছে বুলি সদৰী কৰে ৷
গোসাইগাঁও সমষ্টিৰ উপ নিৰ্বাচনকলৈ নিৰাপত্তাৰক্ষীৰ অতিৰিক্ত বাহিনী মোতায়েন কৰাৰ লগতে অঞ্চল বিশেষে ব্যৱস্থা গ্ৰহণ কৰা হ’ব বুলিও সদৰী কৰে আৰক্ষী বিষয়াগৰাকীয়ে ৷
আনহাতে শাৰদীয় দুৰ্গোৎসৱকলৈ জিলাবাসীক ক’ভিডৰ চৰকাৰী প্ৰট’কল মানি পালন কৰাৰ বাবে আহ্বান জনাই আৰক্ষীৰ শীৰ্ষ বিষয়াগৰাকীয়ে ৷
লগতে পঢ়ক : মহাষষ্ঠী সম্পন্ন : ৰঙিয়াৰ বাৰোৱাৰী শ্ৰীশ্ৰীদুৰ্গা পূজাত ভক্তৰ সমাগম
