ডিফু, 20 জুলাই : ডিফুত এখন বিবাহক কেন্দ্ৰ কৰি দুটা ফৈদৰ মাজত সৃষ্টি দুৰ্বাদল কাজিয়া ৷ ডিফুৰ হৰিলাল বস্তিত হয় সংঘটিত হয় এই কাজিয়া ৷ এজন লোকে দ্বিতীয় বিবাহ কৰোৱাৰ পূৰ্ণ প্ৰস্তুতি চলোৱাৰ সময়তে সংঘটিত হয় এই কাজিয়া ৷
প্ৰাপ্ত তথ্য অনুসৰি, ডিফুৰ হৰিলাল বস্তি নিবাসী মমিনুল ইছলাম নামৰ এজন লোকে প্ৰথমা পত্নী থকাৰ পিছতো দ্বিতীয় বিবাহ কৰাবলৈ লওতেই প্ৰথমা পত্নী আফছানা বেগমে দিয়ে বিধি-পথালি ৷ ঘটনাৰ বিৱৰণী অনুসৰি, আফছানা বেগমক স্বামী মমিনুল ইছলামে দুবছৰ পূৰ্বে অকথ্য শাৰিৰীক, মানসিক নিৰ্যাতন কৰাৰ পিছত আফছানাই সন্তান সহিতে পিতৃগৃহত আশ্ৰয় লৈ আছিল ৷ এই সন্দৰ্ভত আফছানাই ডিফু থানাত স্বামীৰ বিৰুদ্ধে এক গোচৰ ৰুজু কৰিছিল ৷
মমিনুল ইছলামে প্ৰথমা পত্নীৰ অনুমতি অবিহনে আন এগৰাকী মহিলাৰ সৈতে দ্বিতীয় বিবাহখন সামাজিক নিয়ম অনুসৰি সম্পন্ন কৰাৰ খবৰ লাভ কৰে আফছানাই ৷ ইয়াৰ পিছত আফছানাই পুনৰ স্বামীৰ নিৰ্যাতনৰ বিষয়ে উল্লেখ কৰি এজাহাৰ দাখিল কৰে আৰু স্বামীৰ দ্বিতীয় বিবাহখন ৰখাবলৈ আৰক্ষীক মৌখিকভাৱে জনায় ৷ কিন্তু এইক্ষেত্ৰত আৰক্ষীৰ ফালৰ পৰা কোনো সঁহাৰি নোপোৱাৰ অভিযোগ উত্থাপন কৰে আফছানাই ৷
সোমবাৰে পিতৃগৃহত এক সংবাদমেল অনুষ্ঠিত কৰি আফছানাই কয় যে, আৰক্ষীয়ে বিয়াখন ৰখাবলৈ সময়োপযোগী ব্যৱস্থা গ্ৰহণ নকৰাত আফছানাই স্বামীগৃহত প্ৰৱেশ কৰি এই কাৰ্যত বাধা আৰোপ কৰিব বিচাৰে ৷ কিন্তু স্বামী পৰিয়ালে আফছানাক বেয়াকৈ প্ৰহাৰ কৰে ৷ ইয়াৰ পিছত আফছানাৰ পৰিয়ালৰ লোক ঘটনাস্থলীত উপস্থিত হৈ আফছানাৰ হকে মাত মাতিবলৈ যাওঁতে তেওঁলোককো দুৰ্ব্যৱহাৰ কৰে মমিনুল আৰু তেওঁৰ হ’বলগীয়া দ্বিতীয় পত্নীৰ পৰিয়ালে ৷ আফছানাৰ অভিযোগ অনুসৰি, স্বামী মমিনুল ইছলামে তেওঁক যৌতুক বিচাৰি প্ৰায়ে চলাইছিল অকথ্য শাৰিৰীক, মানসিক নিৰ্যাতন ৷
পূৰ্বে আফছানাৰ স্বামীয়ে দাবী কৰা নগদ ধন পিতৃগৃহৰ পৰা নি দিব পৰা নাছিল ৷ স্বামীৰ অত্যাচাৰ সহ্য কৰিব নোৱাৰি আফছানাই বিগত দুবছৰ ধৰি পিতৃগৃহত আশ্ৰয় লৈ আছিল ৷ শেহতীয়াকৈ স্বামীয়ে আফছানাৰ অনুমতি অবিহনে আন এগৰাকী ছোৱালীৰে বিয়া পাতিব লওতে এই খবৰ লাভ কৰি স্বামীৰ দ্বিতীয় বিবাহত বিধি-পথালি দিবলৈ বাধ্য হয় বুলি মন্তব্য কৰে আফছানাই ৷ ইয়াৰ বিপৰীতে প্ৰথমা পত্নীৰ দ্বাৰা আৰোপ কৰা সকলো অভিযোগ পোনচাটে নাকচ কৰিছে মমিনুলে ৷
মমিনুলে বিবাহ বিচ্ছেদৰ বাবে ডিফু আদালতৰ জৰিয়তে প্ৰথমা পত্নী আফছানালৈ জাননী প্ৰেৰণ কৰিছিল বুলি মন্তব্য কৰে ৷ কিন্তু প্ৰথমা পত্নীয়ে কোনো সঁহাৰি নজনোৱাত আদালতে উক্ত বিষয়টো বিচ্ছেদ অবিহনে নিষ্পত্তি কৰে বুলি স্পষ্টকৈ প্ৰকাশ কৰে মমিনুলে ৷ উপায়বিহীন মমিনুলে ডিফু উপায়ুক্তৰ কাৰ্যালয়ত আছিকা বেগম নামৰ মহিলাগৰাকীৰ সৈতে শপতনামাযোগে দ্বিতীয় বিবাহ সম্পন্ন কৰে ৷ আনকি বিবাহপত্ৰত মমিনুলে পূৰ্বৰ সকলো তথ্য উল্লেখ কৰা বুলিও মন্তব্য কৰে ৷
দেওবাৰে ইছলামিক শ্বৰীয়ত অনুযায়ী বিবাহ কৰাবলৈ লওতেই আফছানা বেগমৰ লগতে পিতৃ পৰিয়ালৰ লোকে বাধা প্ৰদান কৰি ঘৰৰ বয়বস্তু লণ্ড-ভণ্ড কৰাৰ লগতে নগদ ধন আৰু সোণ-ৰূপ আদি কাঢ়ি লৈ যায় বুলি অভিযোগ উত্থাপন কৰিছে মমিনুলে ৷ ইছলামধৰ্মী ৰীতি অনুসৰি এগৰাকী ব্যক্তিয়ে চাৰিগৰাকীকৈ মহিলাক বিবাহ কৰাব পাৰে বুলি সাংবাদিকক জানিবলৈ দিয়ে মমিনুলে ৷ অৱশ্যে এইক্ষেত্ৰত প্ৰথমা পত্নীৰ লগতে সন্তানৰ সম্পূৰ্ণ ভৰণ-পোষণৰ দায়িত্ব বহন কৰিবলৈ ৰাজী বুলিও মন্তব্য কৰে ৷ আৰক্ষীয়ে জানিবলৈ দিয়া অনুসৰি এই সন্দৰ্ভত আফছানা বেগম, মমিনুল ইছলাম আৰু আছিকা বেগমে দাখিল কৰা এজাহাৰৰ ভিত্তিত ডিফু থানাত ক্ৰমে ১৯১/২০২১, ১৯২/২০২১ আৰু ১৯৩/২০২১ নম্বৰত তিনিটা পৃথক গোচৰ ৰুজু কৰা হৈছে ৷
লগতে পঢ়ক: সংৰক্ষিত বনাঞ্চলৰ ভূমি বেদখলক কেন্দ্ৰ কৰি উত্তেজনা
