গুৱাহাটী ১ জুলাই: গুৱাহাটী মহানগৰীত শেহতীয়াকৈ অভাৱনীয়ভাৱে বৃদ্ধি পাইছে বিভিন্ন অপৰাধমূলক ঘটনা । চুৰি-ডকাইতিৰ পৰা আৰম্ভ কৰি হত্যাকাণ্ড, পিষ্টল দেখুৱাই মহিলাৰ ডিঙিৰ পৰা চেইন টানি নিয়া ঘটনা নিতৌ সংঘটিত হৈয়ে আছে । এনে অপৰাধমূলক ঘটনাক লৈ এতিয়া মহানগৰ আৰক্ষী প্ৰত্যাহ্বানৰ সন্মুখীন হৈছে। এনে অপৰাধমূলক ঘটনাবোৰ ৰোধ কৰাৰ বাবে আৰক্ষীয়ে মহানগৰীৰ বিভিন্ন স্থানত অভিযান চলাই আছে যদিও অপৰাধমূক কাৰ্য সদায় সংঘটিত হৈয়ে আছে ৷
এইবাৰ নুনমাটিৰ চূনচালি শিৱ মন্দিৰৰ সমীপত নিশা ৰাজপথত এগৰাকী মহিলাক শাৰীৰিকভাৱে আক্ৰমণ কৰি নগদ ধন কাঢ়ি নিয়া ঘটনাই চাঞ্চল্যৰ সৃষ্টি কৰিছে । ইতিমধ্যে মহিলাগৰাকীক আক্ৰমণ কৰা চূনচালিৰ ধৰমবীৰ যাদৱ নামৰ লোকজনক সোধা পোচাৰ বাবে নুনমাটি আৰক্ষীয়ে আটক কৰিছে ।
সুমিত্ৰা দেৱী নামৰ ভুক্তভোগী মহিলাগৰাকীয়ে অভিযোগ কৰা অনুসৰি আজি সন্ধিয়া প্ৰায় ৮.৩০ বজাত ঘৰৰ ওচৰত থকা বজাৰখনলৈ গৈ থকা অৱস্থাত ওচৰ চুবুৰীয়া ধৰমবীৰ যাদৱ নামৰ লোকজনে মহিলাগৰাকীক শাৰীৰিকভাৱে আক্ৰমণ কৰে । ধৰমবীৰ যাদৱে চোকা অস্ত্ৰৰে মহিলা গৰাকীৰ হাতত আক্ৰমণ কৰি কাঢ়ি লৈ যায় নগদ ধন ২০০০ টকা । এই লৈ সৃষ্টি হোৱা হুলস্থুলীয়া পৰিবেশৰ মাজতে সুযোগ বুজি আক্ৰমণকাৰীয়ে তাৰ পৰা পলায়ন কৰিবলৈ সক্ষম হয় ।
পিচত ভুক্তভোগী মহিলাগৰাকীয়ে নুনমাটি আৰক্ষী থানাত ঘটনা সন্দৰ্ভত এখন এজাহাৰ দাখিল কৰে ৷ ইফালে,মহিলাগৰাকীয়ে অনা অভিযোগ খণ্ডন কৰিছে ধৰমবীৰ যাদৱ নামৰ লোকজনে । বৰং সুমিত্ৰা দেৱীৰ পৰিয়ালৰ লোকে ঘৰত গৈ আক্ৰমণ কৰাৰ অভিযোগ তুলি তেওঁলোকেও নুনমাটি থানাত পৃথক কৈ দাখিল কৰিছে এজাহাৰ । পিছে কোন সঁচা কোন মিছা আৰক্ষীৰ তদন্ততহে পোহৰলৈ আহিব। মহানগৰ আৰক্ষীয়ে চোৰৰ প্ৰত্যাহ্বানৰ সন্মুখীন হৈ আহিলেও এই প্ৰত্যাহ্বান গ্ৰহণ কৰাত ব্য়ৰ্থ হোৱা বুলি প্ৰায়ে অভিযোগ উত্থাপিত হৈছে ।
