গুৱাহাটী, 30 অক্টোবৰ : কংগ্ৰেছ দলৰ জ্যেষ্ঠ নেতা তথা প্ৰাক্তন মন্ত্ৰী শৰৎ বৰকটকীৰ দেহাৱসান ৷ নিশা প্ৰায় 1.30 বজাত গুৱাহাটী চিকিৎসা মহাবিদ্যালয় হাস্পতালত শেষ নিশ্বাস ত্যাগ কৰে বৰ্ষীয়ান ৰাজনীতিক নেতাজনে ৷ মৃত্যুৰ সময়ত তেখেতৰ বয়স আছিল 88 বছৰ ৷ বিগত 16 অক্টোবৰৰ পৰা গুৱাহাটীৰ চিকিৎসা মহাবিদ্যালয়ত চিকিৎসাধীন হৈ আছিল নেতাগৰাকী ৷ মৃত্যুৰ পূৰ্বে নেত্ৰ দান কৰি গৈছে শৰৎ বৰকটকীয়ে ৷ সোমবাৰে পুৱা প্ৰায় 10 বজাত গুৱাহাটী চিকিৎসা মহাবিদ্যালয়ৰ মৰ্গৰ পৰা উলিওৱা হয় তেখেতৰ নশ্বৰদেহ ৷
ইয়াৰ পিছতে পোনে পোনে তেখেতৰ নশ্বৰদেহ নিয়া হয় উলুবাৰীস্থিত বাসগৃহলৈ ৷ তাতেই নেতাজনলৈ শেষ শ্ৰদ্ধাঞ্জলি জ্ঞাপন কৰে পৰিয়ালৰ লগতে গুণমুগ্ধ সকলে ৷ বাসভৱনৰ পাছত নেতা গৰাকীৰ নশ্বৰ দেহ লৈ অনা হয় ৰাজীৱ ভৱনলৈ ৷ ৰাজীৱ ভৱনত অন্তিমবাৰৰ বাবে শ্ৰদ্ধাঞ্জলি জ্ঞাপন কংগ্ৰেছৰ নেতা-কর্মী সকলে ৷ ৰাজীৱ ভৱনৰ পৰা দিছপুৰ আইন মহাবিদ্যালয় আৰু বিয়লি সোণাৰিলৈ লৈ যোৱা হয় শৰৎ বৰকটকীৰ নশ্বৰদেহ ৷ সোণাৰিতেই ৰাজ্যিক মৰ্যদাৰে মঙলবাৰে সম্পন্ন হ’ব প্ৰয়াত নেতাজনৰ শেষকৃত্য ৷
বৰ্ষীয়ান নেতা শৰৎ বৰকটকীৰ দেহাৱসানত শোক প্ৰকাশ কংগ্ৰেছৰ দলৰ নেতা-কর্মী সকলৰ ৷ প্ৰদেশ কংগ্ৰেছৰ সভাপতি ভূপেন বৰাই এই সন্দৰ্ভত কয়,"শৰৎ বৰকটকী ডাঙৰীয়া কংগ্ৰেছৰ বাবে অভিভাৱক আছিল ৷ ৰাইজে নজনা ৰাজীৱ ভৱনৰ আভ্যন্তৰীণ কাম-কাজ সমূহ শৰৎ বৰকটকী ডাঙৰীয়াই কৰিছিল ৷ নিৰ্বাচনত হাৰি ভাঙি যোৱা দলটোক এই পৰ্যায়লৈ লৈ আনিছিল বৰকটকী দেৱে ৷ বৰকটকী ছাৰ গুৱাহাটীত থকাৰ বাবে মই ৰাজীৱ ভৱনৰ ক্ষেত্ৰত চিন্তামুক্ত হৈ আছিলো ৷ সকলো ক্ষেত্ৰতে তেখেতে চকু ৰাখিছিল ৷"
কংগ্ৰেছ নেতা জাকিৰ হুছেইন শিকদাৰে বৰ্ষীয়ান নেতাজনৰ বিয়োগ সন্দৰ্ভত কয়, "ৰাজীৱ ভৱনত প্ৰথম প্ৰৱেশৰ দিনাৰ পৰাই মই শৰৎ বৰকটকী দেৱৰ সান্নিধ্য লাভ কৰিছিলো ৷ কংগ্ৰেছৰ ভাল দিন, বেয়া দিন সকলো সময়তেই তেওঁ দলৰ হৈ কাম কৰি গৈছিল ৷" ইফালে নেতাগৰাকীক শেষ শ্ৰদ্ধাঞ্জলি জ্ঞাপনৰ বাবে ৰাজীৱ ভৱনত উপস্থিত হয় আলোচনাপন্থী আলফা নেতা অৰবিন্দ ৰাজখোৱা ৷ শৰৎ বৰকটকীৰ নশ্বৰ দেহত শ্ৰদ্ধাঞ্জলি জ্ঞাপন কৰে আলফা নেতাগৰাকীয়ে ৷
শৰৎ বৰকটকীৰ মৃত্যুত ৰাজ্যৰ ৰাজনৈতিক দল সমূহৰ লগতে বিভিন্ন দল- সংগঠন সমূহেও শোক প্ৰকাশ কৰে ৷ শৰৎ বৰকটকীৰ মৃত্যুত সমাজিক মাধ্যমযোগে শোক প্ৰকাশ কৰি মুখ্যমন্ত্ৰী হিমন্ত বিশ্ব শৰ্মাই উল্লেখ কৰে, "জ্যেষ্ঠ ৰাজনীতিবিদ, অসম চৰকাৰৰ প্ৰাক্তন মন্ত্ৰী শৰৎ বৰকটকী ডাঙৰীয়াৰ মৃত্যুৰ বাতৰিত মৰ্মাহত হৈছোঁ ৷ এগৰাকী দক্ষ ৰাজনীতিবিদ তথা নিকা ব্যক্তিত্বৰ অধিকাৰী বৰকটকী ডাঙৰীয়াক বহু বছৰ সতীৰ্থ হিচাবে পাওঁতে তেখেতৰ পৰা বিভিন্ন কথা শিকিবলৈ পাইছিলোঁ ৷ তেখেতৰ মৃত্যু অসমৰ ৰাজনৈতিক ক্ষেত্ৰত এক বৃহৎ ক্ষতি ৷ প্ৰবীণ ৰাজনীতিবিদগৰাকীৰ বিদেহ আত্মাৰ চিৰশান্তি কামনা কৰি ঈশ্বৰৰ ওচৰত প্ৰাৰ্থনা জনালোঁ আৰু শোকসন্তপ্ত পৰিয়ালবৰ্গলৈ গভীৰ সমবেদনা জনালোঁ ৷ সম্পূৰ্ণ ৰাজ্যিক মৰ্যদাৰে বৰকটকী ডাঙৰীয়াৰ অন্ত্যেষ্টিক্ৰিয়া সম্পন্ন কৰা হ'ব ৷"
লগতে পঢ়ক : Veteran Congress leader Sarat Barkataki: প্ৰবীণ ৰাজনীতিবিদ-শিক্ষাবিদ শৰৎ বৰকটকীৰ দেহাৱসান
