গুৱাহাটী, ১২ জুন : ৰাজ্যত এফালে যদি চিকিৎসক নিগ্ৰহৰ ঘটনা বৃদ্ধি পাবলৈ ধৰিছে আনফালে ৰাজ্যৰ বিভিন্ন প্ৰান্তত আৰক্ষীৰ জালত ভুৱা চিকিৎসক (fake doctor) ৷ ৰাজ্যৰ বিভিন্ন প্ৰান্তৰ দৰে গুৱাহাটী মহানগৰীত ক্ৰমাগতভাৱে বৃদ্ধি পাইছে ভুৱা চিকিৎসক । ভগৱানৰূপী চিকিৎসকৰ পেশাত কলংক সনা এনে ভুৱা চিকিৎসকৰ তত্বৱধানত আস্থা আৰু বিশ্বাস ৰখা প্ৰতিজন সচেতন লোক এতিয়া শংকিত হৈ পৰিছে ।
তাৰমাজতে বৃহস্পতিবাৰে মালিগাঁৱত এজন ভুৱা চিকিৎসক গ্ৰেপ্তাৰ হোৱাৰ খবৰ নৌমাৰ যাওঁতেই শুকুৰবাৰে নিশা ফটাশিল আমবাৰী আৰক্ষীৰ জালত পৰিছে অমৃত কুমাৰ সেনগুপ্তা নামৰ আন এজন ভুৱা চিকিৎসক । নিজকে হৃদৰোগৰ বিশেষজ্ঞ চিকিৎসক বুলি চিনাকি দিছিল ধৃত অমৃতে ।
শেহতীয়াকৈ জ্যোতিকুচিৰ মালতী সেন মেম'ৰিয়েল হাস্পতালত কৰ্মৰত হৈ আছিল ভুৱা চিকিৎসকজন । ইপিনে গোপন তথ্যৰ ভিত্তিত শুকুৰবাৰে নিশা ফটাশিল আমবাৰী আৰক্ষীয়ে গ্ৰেপ্তাৰ কৰিছে মুন্নাভাই এমবিবিএছ(Munna Bhai MBBS) ৰূপী অমৃত কুমাৰ সেনগুপ্তাক ।
সম্প্ৰতি আৰক্ষীৰ জিম্মাত থকা ধৃত অমৃতে আৰক্ষীৰ সন্মুখত চিকিৎসকৰ কোনো নথি পত্ৰ দেখুৱাব পৰা নাই । আনহাতে, তেওঁৰ লগতে এগৰাকী যুৱতীকো আটক কৰিছে আৰক্ষীয়ে । উল্লেখযোগ্য যে, পূৰ্বেও শিৱসাগৰত অনুৰূপ অভিযোগত গ্ৰেপ্তাৰ হৈছিল অমৃত কুমাৰ সেনগুপ্তা ।
