গুৱাহাটী,21 জানুৱাৰী: প্ৰধানমন্ত্ৰী নৰেন্দ্ৰ মোদীৰ বাবে দেশ ২০ বছৰ পিছুৱাই গৈছে । দেশত বৰ্তমান ভয় আৰু নিৰাপত্তাহীনতাৰ বাতাবৰণ বিৰাজ কৰিছে । নাগৰিকত্ব সংশোধনী আইনৰ কোনো প্ৰয়োজন নাছিল দেশত । প্ৰধানমন্ত্ৰী নৰেন্দ্ৰ মোদী আৰু বিজেপিক তীব্ৰ আক্ৰমণ কংগ্ৰেছ নেতা আনন্দ শৰ্মাৰ । কংগ্ৰেছ নেতা তথা ৰাজ্যসভাৰ সাংসদ আনন্দ শৰ্মাই মঙলবাৰে ৰাজীৱ ভৱনত এক সংবাদমেল অনুষ্ঠিত কৰি কেন্দ্ৰৰ বিজেপি চৰকাৰৰ লগতে প্ৰধানমন্ত্ৰী নৰেন্দ্ৰ মোদীক উদ্দেশ্যি তীব্ৰ আক্ৰমণাত্মক মন্তব্য কৰে ৷ তেওঁ কয় যে, প্ৰধানমন্ত্ৰী নৰেন্দ্ৰ মোদীৰ ভুল নীতি সমূহৰ বাবে দেশ ২০ বছৰ পিছুৱাই গৈছে । মোদীয়ে বিমুদ্ৰাকৰণৰ লগতে কেইবাটাও ভুল নীতি গ্ৰহণ কৰাৰ ফলত বৰ্তমান দেশৰ অৱস্থা অতিকৈ শোচনীয় হৈ পৰিছে । দেশৰ জনতা বৰ্তমান শংকিত, দেশত বৰ্তমান ভয় আৰু অসুৰক্ষাৰ বাতাবৰণ বিৰাজ কৰিছে বুলি মন্তব্য কৰি শৰ্মাই বিজেপিক তীব্ৰ সমালোচনা কৰে ।
লগতে পঢ়ক: ৰাজ্যজুৰি নাগৰিকত্ব সংশোধনী আইনৰ বিৰুদ্ধে প্ৰতিবাদ
নাগৰিকত্ব সংশোধনী আইন সন্দৰ্ভত শৰ্মাই কয় যে, এই আইনখনৰ দেশত কোনো প্ৰয়োজন নাছিল । এই বিতৰ্কিত আইনখনে দেশৰ সংবিধানৰ ওপৰত আঘাট কৰাৰ লগতে ভাৰতৰ চুবুৰীয়া ৰাষ্ট্ৰ সমূহৰ লগত এই আইনখনৰ বাবে ভাৰতৰ সম্পৰ্ক বিনষ্ট হ'বলৈ ধৰিছে । শৰ্মাই লগতে কয় যে, নাগৰিকত্ব সংশোধনী আইন ভৱিষ্যতে দেশৰ আৰু অধিক ক্ষতি সাধন কৰিব । চৰকাৰে এই বিতৰ্কিত আইনখন অতি শীঘ্ৰে বাতিল কৰিব লাগে বুলিও মন্তব্য প্ৰকাশ কৰে আনন্দ শৰ্মাই ।
লগতে পঢ়ক:ৰোহিংগীয়াৰ বিপক্ষে যুদ্ধ অপৰাধ প্ৰতিবন্ধকতা নহয়ঃ ম্যানমাৰ সেনা
