শৃংখল চলিহাক ২ দিনৰ বাবে চি আই ডিৰ জিম্মালৈ প্ৰেৰণ কৰিলে ন্যায়ালয়ে

সংগ্ৰামী সতীৰ্থক এনেদৰে কাৰাৰুদ্ধ কৰিলে বীৰ লাচিত সেনাৰ তৰফৰ পৰা ৮৩ৰ দৰে ভয়ংকৰ আন্দোলন গঢ়ি তোলা হ'ব বুলি হুংকাৰ দিয়ে বীৰ লাচিত সেনাৰ উপদেষ্টা গৰাকীয়ে ৷ পোতাশালৰ ভয় দেখুৱাই চৰকাৰে আন্দোলন অৱদমিত কৰিবলৈ সক্ষম ন'হব বুলিও মন্তব্য কৰে সংগঠনটোৰ সদস্য সকলে ৷

গুৱাহাটী , 26 ডিচেম্বৰঃ বুধবাৰে বীৰ লাচিত সেনাৰ নেতা শৃংখল চলিহাক হাজিৰ কৰোৱা হ'ল মুখ্য ন্যায়াধীশ দণ্ডাধীশৰ কাৰ্যালয়ত ৷ ইয়াৰ পাচতে 2 দিনৰ বাবে চি আই ডিৰ জিম্মালৈ নেতাজনক প্ৰেৰণ কৰে ন্যায়ালয়ে ৷ উল্লেখযোগ্য যে , নাগৰিকত্ব সংশোধনী আইন বিৰোধী আন্দোলনক নেতৃত্ব প্ৰদান কৰাৰ সময়তে ডিব্ৰুগড়ৰ পৰা আটক কৰা হৈছিল বীৰ লাচিত সেনাৰ সাংগঠনিক সম্পাদকজনক ৷ নেতাগৰাকীক আদালতৰ চৌহদত হাজিৰ কৰোৱাৰ সময়তে জই আই অসম ধ্বনি দিয়ে শৃংখল চলিহাৰ লগতে বীৰ লাচিত সেনাৰ সদস্য সকলে ৷ সংগ্ৰামী সতীৰ্থক এনেদৰে কাৰাৰুদ্ধ কৰিলে বীৰ লাচিত সেনাৰ তৰফৰ পৰা ৮৩ৰ দৰে ভয়ংকৰ আন্দোলন গঢ়ি তোলা হ'ব বুলি হুংকাৰ দিয়ে বীৰ লাচিত সেনাৰ উপদেষ্টা গৰাকীয়ে ৷ সংগঠনটোৰ আন এগৰাকী সদস্যাই মন্তব্য কৰে যে ,চৰকাৰে প্ৰতিবাদী জনতাক পোতাশাললৈ নিক্ষেপ কৰি সংগ্ৰাম স্তব্ধ কৰিব নোৱাৰে ৷ যিমানেই চৰকাৰে প্ৰতিবাদীক কাৰাৰুদ্ধ কৰিব , হাজাৰ অখিল গগৈ, শৃংখল চলিহা ওলাই আহিব ৷ আনহাতে চি আই ডিয়ে শৃংখল চলিহাক ৫ দিনৰ বাবে জিম্মাত বিচাৰিছিল যদিও আদালতে ২ দিনৰ বাবে চি আই ডিৰ জিম্মাত নিবলৈ অনুমতি দিয়ে ৷ লগতে 24 ঘণ্টাৰ মূৰে মূৰে স্বাস্থ্য নেতাজনৰ স্বাস্থ্য পৰীক্ষা কৰিবলৈও নিৰ্দেশ দিয়ে ন্যায়ালয়ে ৷

লগতে পঢ়কঃ অগণতান্ত্ৰিক পন্থাৰ আন্দোলন চৰকাৰে কোনো কাৰণত মানি নলয়!