গুৱাহাটী, 23 ডিচেম্বৰ : ৰাজ্যৰ কৃষিখণ্ডৰ উত্তৰণত অবিৰত আৰু সময়োপযোগী জলসিঞ্চনৰ গুৰুত্বৰ কথা বিবেচনা কৰি দুয়োটা বিভাগৰ কাম-কাজত সামঞ্জস্য অনাৰ লক্ষ্যৰে কৃষিমন্ত্ৰী অতুল বৰাই জনতা ভৱনস্থিত কাৰ্যালয়ৰ সভাগৃহত শুকুৰবাৰে জলসিঞ্চন আৰু কৃষি বিভাগৰ এখন বিশেষ যুটীয়া বৈঠক অনুষ্ঠিত কৰা হয় । কৃষিমন্ত্ৰী অতুল বৰা আৰু জলসিঞ্চন মন্ত্ৰী অশোক সিংহলৰ লগতে দুয়োটা বিভাগৰ শীৰ্ষ বিষয়াসকলৰ উপস্থিতিত অনুষ্ঠিত থাকে এই বৈঠকত ৷
বৈঠকত আন্তঃবিভাগীয় সমন্বয়ৰ মাধ্যমেৰে কৃষক ৰাইজ উপকৃত হ’ব পৰাকৈ বিভিন্ন গুৰুত্বপূৰ্ণ সিদ্ধান্ত গ্ৰহণ কৰা হয় । এই বৈঠকৰ পিচতে সংবাদ মাধ্যমক সম্বোধন কৰে দুয়োগৰাকী মন্ত্ৰীয়ে ৷ তাৰ পাচতে দুয়োগৰাকী মন্ত্ৰীয়ে বৈঠকৰ সিদ্ধান্তসমূহ সংবাদ মাধ্যমৰ আগত সদৰী কৰে ।
বৈঠকত হোৱা সিদ্ধান্ত লোৱা অনুসৰি এতিয়াৰ পৰা দুয়োটা বিভাগেই উমৈহতীয়া লক্ষ্যৰ বিভিন্ন আঁচনি ৰূপায়ণৰ ক্ষেত্ৰত পৰস্পৰৰ আন্তঃগাঁথনি আৰু প্ৰযুক্তি ব্যৱহাৰ কৰিব । কৃষি বিভাগৰ পৰামৰ্শ অনুসৰি জলসিঞ্চন বিভাগে নিৰ্দিষ্ট এলেকাত প্ৰকল্প হাতত ল’ব ৷
একেদৰে জলসিঞ্চন বিভাগৰ প্ৰকল্পই সামৰি লোৱা এলেকাসমূহৰ কৃষক ৰাইজক বছৰত দুই বা ততোধিক খেতি কৰাৰ বাবে কৃষি বিভাগে উৎসাহিত কৰিব । ক্ষেত্ৰ পৰ্যায়ত দুয়ো বিভাগৰ বিষয়ববীয়াসকলে সমন্বয় ৰক্ষাৰে কাম কৰাৰ লগতে প্ৰতিমাহে দুয়োটা বিভাগৰ শীৰ্ষ বিষয়াসকলে যুটীয়া পৰ্যালোচনা বৈঠকত মিলিত হ’ব বুলি মন্ত্ৰীদ্বয়ে উল্লেখ কৰে ।
আনহাতে, মন্ত্ৰীদ্বয়ে যুটীয়াভাৱে সঘনে বিভিন্ন অঞ্চল ভ্ৰমণ কৰি জলসিঞ্চনৰ মাধ্যমেৰে কৃষিখণ্ডক শক্তিশালীকৰণৰ বাবে ৰাইজক উদ্বুদ্ধ কৰিব বুলিও এই বৈঠকত সিদ্ধান্ত লয় । শুকুৰবাৰে আয়োজিত এই বৈঠকত জলসিঞ্চন বিভাগৰ অতিৰিক্ত মুখ্য সচিব এছ আব্বাছী, কৃষি বিভাগৰ অতিৰিক্ত মুখ্য সচিব তথা কৃষি উপাদন আয়ুক্ত ডঃ আশীষ কুমাৰ ভূটানী, জলসিঞ্চন বিভাগৰ আয়ুক্ত-সচিব এম এছ মনিৱন্নন, সচিব পবিত্ৰৰাম খাউণ্ড আৰু কৃষি বিভাগৰ সঞ্চালক ভাস্কৰ পেগুৰ লগতে দুয়োটা বিভাগৰ শীৰ্ষ বিষয়াসকল উপস্থিত থাকে ৷
লগতে পঢ়ক : গোলাঘাটৰ মৰাপাটৰ বেগৰ ব্যৱসায়ে দখল কৰিছে বিশ্বৰ ৩৫ খন দেশৰ বজাৰ
