হাইলাকান্দি,8 ফেব্ৰুৱাৰীঃ সমগ্ৰ অসমৰ লগতে সোমবাৰে হাইলাকান্দি জিলাতো জনস্বাস্থ্য কাৰিকৰী বিভাগৰ অস্থায়ী কৰ্মচাৰীসকলে উত্তাল প্ৰতিবাদ সাব্যস্ত কৰে ৷ পুৱা ১০ বজাৰ পৰা জিলাখনৰ কাটলিছেৰা সমষ্টিৰ মণিপুৰ জনস্বাস্থ্য কাৰিকৰী বিভাগৰ কাৰ্যালয়ৰ সম্মুখৰ গেটত তলা ওলোমাই এই প্ৰতিবাদ সাব্যস্ত কৰে কৰ্মচাৰীসকলে ৷ প্ৰতিবাদকাৰীসকলে অসম চৰকাৰ হায় হায়, জনস্বাস্থ্য কাৰিকৰী বিভাগৰ মন্ত্ৰী ৰিহণ দৈমাৰী মুৰ্দাবাদ আদি শ্ল'গানেৰে উত্তাল কৰি তোলে পৰিৱেশ ৷
ইপিনে,শীঘ্ৰে চৰকাৰে দৰমহাৰ বকেয়া ধন মুকলি কৰি নিদিলে আৰু চাকৰিৰ স্থায়ীকৰণ নকৰিলে অনাগত দিনতো এই প্ৰতিবাদ অব্যাহত থাকিব বুলি হুংকাৰ প্ৰদান কৰে জনস্বাস্থ্য কাৰিকৰী বিভাগৰ কৰ্মীসকলে ৷ প্ৰতিবাদকাৰীসকলৰ লগত মণিপুৰ ৰাইজেও হাতত কলহ লৈ বিভাগটোৰ কাৰ্যালয়ৰ সন্মুখত বিগত ৮ দিনে লাভ নকৰা খোৱা পানীৰ সন্দৰ্ভত প্ৰতিবাদ সাব্যস্ত কৰে ৷ উল্লেখ্য যে, বিগত 1 ফেব্ৰুৱাৰীৰ পৰা পানী যোগান আঁচনিৰ অস্থায়ী কৰ্মীসকলে কৰ্মবিৰতি আন্দোলন ৰূপায়ণ কৰিছে ।
লগতে পঢ়কঃ ভাৰতীয় বায়ু সেনাত অন্তৰ্ভুক্ত হোৱাৰ দিশে ৰাফেল যুঁজাৰু বিমান
