সৰুপথাৰ , 12 জুন : ধনশিৰি মহকুমাৰ সীমান্তৰ চুঙাজানত দিন দুপৰতে নগা দুৰ্বৃত্তই ব্যৱসায়ী সকলৰ পৰা ধন দাবী কৰি তাণ্ডৱৰ সৃষ্টি কৰাৰ তথ্য পোহৰলৈ আহিছে ৷ প্ৰাপ্ত তথ্যা অনুসৰি , মঙলবাৰে কেইটামান নগা দুৰ্বৃত্তই চুঙাজান এমভি চাৰিআলিৰ ব্যৱসায়ী সকলৰ পৰা দাবী কৰা ধন নিবলৈ আহিছিল ৷ তেনে সময়তে স্থানীয় ৰাইজে নগা দুৰ্বৃত্ত কেইটাক কৰায়ত্ব কৰিবলৈ চেষ্টা কৰাত নগা দুৰ্বৃত্ত কেইটাই ৰাইজক পিষ্টল দেখুৱাই ভাবুকি দি আঁতৰি যায় ৷
উল্লেখ্য যে, সোমবাৰেও নগা দুৰ্বৃত্তই উক্ত অঞ্চললৈ আহি এজন যুৱ ব্যৱসায়ীক ধন নিদিয়াৰ বাবে প্ৰহাৰ কৰিছিল ৷ ইপিনে অঞ্চলটোৰ ব্যৱসায়ী সকলক নগা দুৰ্বৃত্তই ধন দাবী কৰি আহিছে যদিও, চিআৰপিএফ আৰু ধনশিৰি মহকুমা প্ৰশাসনে , ৰাইজক নিৰাপত্তা দিয়াত সম্পূৰ্ণ ৰূপে ব্যৰ্থ হৈছে বুলি স্থানীয় ৰাইজে জানিবলৈ দিয়ে ৷ ঘটনা সংঘটিত হোৱা কিছু নিলগতে চিআৰপিএফৰ শিৱিৰ আছে যদিও, তেওঁলোকক খবৰ দিয়াৰ পাচতো কোনো এজন চিআৰপিএফৰ লোক শিৱিৰৰ পৰা ওলাই নাহিল বুলি বিভিন্ন জনে অভিযোগ উত্থাপন কৰিছে | তদুপৰি ঘটনাস্থলীত চুঙাজান আৰক্ষী পলমকৈ উপস্থিত হৈ যদিও, দুৰ্বৃত্তই সেই সময়লৈ পলাই যাবলৈ সক্ষম হয় ৷ এতিয়া এক প্ৰকাৰৰ নিৰাপত্তাহীনতাত ভুগা সীমান্তবাসীক নিৰাপত্তা কোনে দিব , ইয়াকলৈ এতিয়া সচেতন মহলৰ মাজত প্ৰশ্ন উত্থাপিত হৈছে ৷
