মৰাণ, 9 ফেব্ৰুৱাৰী : জলসম্পদ বিভাগলৈ বাট নাচাই মৰাণত ৰাইজে নিৰ্মাণ কৰিবলৈ আগবাঢ়ি আহিলে ব্ৰহ্মপুত্ৰৰ খহনীয়া প্ৰতিৰোধৰ কাম ৷ মৰাণৰ সমীপৰ ডিমৌ ৰাজহ চক্ৰৰ অন্তৰ্গত পানীদিহিং মৌজাৰ পশ্চিম পানীদিহিঙত ৰাইজে নিজাববীয়াকৈ নিৰ্মাণ কৰিবলৈ আগবাঢ়ি আহিল খহনীয়া প্ৰতিৰোধৰ বাবে বান্ধ ৷
জানিব পৰা মতে, উক্ত অঞ্চলৰ দহখনৰো অধিক গাঁৱৰ ৰাইজে খহনীয়া সমস্যাৰ কবলত পৰি আহিছিল ৷ এইক্ষেত্ৰত জলসম্পদ বিভাগক ৰাইজৰ সমস্যা সমাধানৰ বাবে অনুৰোধ জনোৱা হৈছিল যদিও জলসম্পদ বিভাগে কোনো ধৰণৰ গুৰুত্ব প্ৰদান নকৰাৰ অভিযোগ ৰাইজৰ ৷ আনকি এই সমস্যা সমাধানৰ বাবে 'গৰাখহনীয়া প্ৰতিৰোধ সমিতি' নামৰ সংস্থাৰো জন্ম হৈছিল উক্ত অঞ্চলত ৷
শেষত উপায়বিহীন হৈ ৰাজ্য চৰকাৰৰ জলসম্পদ বিভাগলৈ বাট নাচাই গৰাখহনীয়া প্ৰতিৰোধৰ কাম কৰিবলৈ আগবাঢ়ি আহিছে সংস্থাটোৱে ৷ এইক্ষেত্ৰত ৰাইজেও সামৰ্থ অনুসৰি দান বৰঙণি সংগ্ৰহ কৰি কাম কৰি যাব বুলি জানিবলৈ দিয়ে ৷ তদুপৰি টি এম পি কে, এম এম কে আদি সংগঠনে ৰাইজক কিছু পৰিমাণে সহযোগ কৰা বুলি ৰাইজে জানিবলৈ দিয়ে ।
লগতে পঢ়ক : পূব লাডাখৰ সীমান্তত চীনা সৈন্যৰ নতুন কৌশল
