শিলচৰ,15 জুন : অহা ১৭ জুনৰ পৰা আৰম্ভ হ'বলগীয়া সপ্তদশ লোকসভা অধিৱেশনত শপত গ্ৰহণ কৰিব দেশৰ নৱ-নিৰ্বাচিত সাংসদসকলে । বাংলাত শপত গ্ৰহণ কৰিব শিলচৰ সংসদীয় সমষ্টিৰ পৰা প্ৰথমবাৰলৈ নিৰ্বাচিত হোৱা বিজেপি সাংসদ ডা: ৰাজদীপ ৰয়ে ৷ ইতিমধ্যে লিখিতভাবে সংসদৰ কাৰ্যালয়ৰ লগতে মুখ্যমন্ত্ৰীকো এই কথা অৱগত কৰিছে ৰাজদীপ ৰয়ে । শিলচৰৰ দলীয় কাৰ্যালয়ত এক সংবাদমেলযোগে এই কথা সদৰী কৰে নৱ-নিৰ্বাচিত সাংসদগৰাকীয়ে ৷ সাংসদ হিচাপে বৰাকৰ উন্নয়নৰ ক্ষেত্ৰত সংসদত কি কি বিষয় উত্থাপন কৰিব তাৰো কিছু তথ্য সাংবাদিকৰ আগত দাঙি ধৰে সাংসদগৰাকীয়ে ।
বৰাক উপত্যকাৰ পাঁচটা ৰাষ্ট্ৰীয় পথৰ উন্নয়নৰ কাম খৰতকীয়া কৰাৰ লগতে বৰাকৰ স্বাস্থ্য খণ্ড আৰু অসম বিশ্ব বিদ্যালয়ৰ আন্তঃগাঁথনি উন্নয়নৰ ক্ষেত্ৰতো বিশেষ গুৰুত্ব প্ৰদান কৰিব সাংসদগৰাকীয়ে । এগৰাকী চিকিৎসক হোৱা হেতুকে ইতিমধ্যে কেন্দ্ৰীয় স্বাস্থ্য মন্ত্ৰীগৰাকীৰ সৈতে এই সন্দৰ্ভত এক আলোচনাতো মিলিত হৈছে সাংসদগৰাকী । অসম বিশ্ব বিদ্যালয়ৰ উন্নয়নৰ বাবে কেন্দ্ৰীয় মানৱ উন্নয়ন মন্ত্ৰীগৰাকীক শিলচৰলৈ আমন্ত্ৰণ কৰাৰো সিদ্ধান্ত লৈছে ৰাজদীপ ৰয়ে । অহা ছ মাহৰ ভিতৰত মন্ত্ৰী গৰাকী অসম বিশ্ব বিদ্যালয়লৈ আহিব বুলিও আশা ব্যক্ত কৰে ৰাজদীপ ৰয়ে ।
