বৰপেটা, 15 জুন : আৱাসিক বিদ্যালয়ত সুৰক্ষিত নহয় ছাত্ৰী-শিক্ষয়িত্ৰী ৷ নিশা হ'লেই আৱাসিক বিদ্যালয়খনৰ চৌপাশে ঘূৰি ফুৰে উদণ্ড যুৱকৰ দল ৷ খিৰিকীৰে নাবালিকা ছাত্ৰীৰ দেহত দিয়ে হাত ৷ আনকি অসৎ কামনাৰে ভেন্টিলেচন ভাঙি শিক্ষয়িত্ৰীৰ কোঠাত প্ৰৱেশৰো অপচেষ্টা যুৱকৰ দলটোৰ ৷ যদিও এনে ঘটনাকলৈ উদাসীন শিক্ষা বিভাগ, উদাসীন আৰক্ষী-প্ৰশাসন ৷ বৰপেটাৰ বাঘবৰ সমষ্টিৰ মন্দিয়াত অৱস্থিত কস্তুৰবা গান্ধী বালিকা আৱাসিক বিদ্যালয়ত সংঘটিত হয় এই ঘটনা ৷ ফলত নিশা হ'লেই আতংকিত হৈ পৰে বিদ্যালয়ৰ শিক্ষয়ত্ৰী আৰু ছাত্ৰীসকল ৷ উদণ্ড যুৱকৰ কামনাৰ বলি হোৱাৰ আশংকাত এতিয়া প্ৰতি নিশাই বিনিদ্ৰ ৰজনী কটাইছে আৱাসী সকলে ৷
বিদ্যালয়খনত ঘটি থকা এনে জঘন্য ঘটনাৰ বিষয়ে পূৰ্বেও বাতৰি সম্প্ৰচাৰ হৈছিল যদিও গা-লৰা নাই শিক্ষা বিভাগৰ ৷ ইপিনে আৱাসিক বিদ্যালয়খনত নাই নিৰাপত্তাৰ কোনো ব্যৱস্থা ৷ নাই চৌহদত কোনো দেৱাল, নাই পোহৰৰ ব্যৱস্থা ৷ কোঠাৰ দুৱাৰ খিৰিকীবোৰৰ অৱস্থাও তথৈবচ ৷ যাৰ সুযোগ লৈ ভগ্ন খিৰিকীৰে যুৱকে নিশা ছাত্ৰীৰ শ্লীলতা হানিৰ অপচেষ্টা চলায় ৷ লক্ষণীয়ভাৱে বিদ্যালয়খনৰ একেবাৰে সন্মুখতে আছে মন্দিয়া থানা ৷ অথচ অপৰাধীক কৰায়ত্ব কৰাত ব্যৰ্থ আৰক্ষী ৷ ইতিমধ্যে দুখনকৈ এজাহাৰ দাখিল কৰাৰ লগতে আৰক্ষী অধীক্ষককো জনোৱা হৈছে সমস্ত ঘটনা ৷ তথাপিও বিদ্যালয়খনত উপস্থিত হোৱা নাই কোনো এগৰাকী শিক্ষা বিষয়া, উপস্থিত হোৱা নাই আৰক্ষীৰ শীৰ্ষ বিষয়া ৷
আৰু পঢ়ক - বিশ্বনাথৰ বাঘমাৰীত অস্ত্ৰসহ গ্ৰেপ্তাৰ দুজন ব্যক্তি
