বৰপেটাত বানাক্ৰান্তক লৈ ভেকোভাওনা চৰকাৰৰ

বৰপেটা, ১৯ জুলাইঃ বানত এতিয়া বৰপেটা ৷ মৰা চাউলখোৱা আৰু মৰানদীৰ পানীয়ে চহৰখনৰ কিছুমান অঞ্চল প্লাৱিত কৰাৰ সমান্তৰালকৈ বৰষুণৰ পানীয়ে সৃষ্টি কৰা কৃত্ৰিম বানত জলবন্দী এতিয়া বৰপেটা চহৰ ৷ চহৰখনৰ বানপীড়িতই বিভিন্ন আশ্ৰয় শিৱিৰত আশ্ৰয় লোৱাৰ লগতে চাউলখোৱাৰ মথাউৰিতো আশ্ৰয় লৈছে বহু বানপীড়িতই ৷ বৰপেটা চহৰৰ ২১ নং ৱাৰ্ডৰ একাংশ বানপীড়িতই বিগত ৫ দিন ধৰি আশ্ৰয় লৈ আছে ভকতপাৰা LP স্কুলত স্থাপন কৰা আশ্ৰয় শিৱিৰত ৷

কিন্তু পৰিতাপৰ কথা যোৱা ৫ দিন ধৰি আশ্ৰয় শিৱিৰত থকা বানপীড়িতই পোৱা নাই এমুঠি চাউল-দাইল ৷ জিলা প্ৰশাসনে যোগান ধৰা নাই কোনো বান সাহাৰ্য ৷ কোনো লোকে বৃহস্পতিবাৰে এমুঠি চিৰা বিতৰণ কৰাৰ বাহিৰে শিৱিৰটোত আশ্ৰয় লোৱা লোকসকলে পোৱা নাই কোনো ধৰণৰ সহায় ৷ আনকি শিৱিৰটোত নাই এটুপি বিশুদ্ধ খোৱা পানীৰ ব্যৱস্থা ৷ শিৱিৰত থকা লোকসকলে জিলা প্ৰশাসনক জনোৱাৰ পিচত বৃহস্পতিবাৰে নিশা শিবিৰটোত এটা দমকল বহুৱাইছিল যদিও পানী যোগানৰ নামত যেন শিৱিৰবাসীক উপলুঙাহে কৰিলে জনস্বাস্থ্য কাৰিকৰী বিভাগটোৱে ৷ কাৰণ দমকলটোৰে পানীৰ সলনি ওলাই বোকাপানীহে ৷ দেখা গৈছে মাথো ৫-10 ফুট দীঘল এডাল পাইপেৰে দমকল বহুৱাই দায়িত্ব সামৰিছে জনস্বাস্থ্য বিভাগে ৷ ইপিনে এই ঘটনাকলৈ এতিয়া তীব্ৰ প্ৰতিক্ৰিয়াৰ সৃষ্টি হৈছে বৰপেটাত ৷