বাক্সা, 26 নৱেম্বৰঃ বাক্সাৰ তামুলপুৰত সংঘটিত হ'ল এক আজৱ ঘটনা ৷ তামুলপুৰৰ নৱম আৰু দশম শ্ৰেণীত অধ্যয়নৰত দুই কিশোৰ কিশোৰীৰ প্ৰেম কাহিনীয়ে ৰগৰ তুলিছে বাক্সাৰ তামুলপুৰত। প্ৰেমিকাই ঘৰৰ পৰা পলাই আহি ১৫টা কৈ দিন প্ৰেমিকৰ শোৱনি কোঠাত লুকাই থকাৰ পাছত অৱশেষত আৰক্ষীয়ে উদ্ধাৰ কৰে দুয়োকে ৷ ঘটনা অনুসৰি ১৪ বছৰীয়া ছাত্ৰী গৰাকীয়ে মোমায়েকৰ ঘৰত থাকি পঢ়া শুনা কৰিছিল । হঠাতে এদিন ছাত্ৰী গৰাকীৰ চাইকেলখন হেৰুৱাত ককাকে গালি পাৰে কিশোৰীগৰাকীক,ইয়াৰ পিছতে যোৱা ৭নৱেম্বৰৰ পৰা ককাকৰ ঘৰৰ পৰা সন্ধানহীন হৈ পৰে কিশোৰীগৰাকী। পৰিয়ালৰ লোকে বহু বিচাৰ খোচাৰ কৰাৰ পিছতো কিশোৰীগৰাকীৰ সম্ভেদ উলিয়াব নোৱাৰি ১৫ নৱেম্বৰত কিশোৰী গৰাকী নিৰূদ্দেশ সম্পৰ্কে এখন এজাহাৰ দাখিল কৰে তামুলপুৰ আৰক্ষী থানাত। এজাহাৰৰ ভিত্তিত আৰক্ষীয়ে বিচাৰ খোচাৰ কৰিছিল যদিও প্ৰথম অৱস্থাত সম্ভেদ উলিয়াব নোৱাৰিলে যদিও ২৪ তাৰিখে সন্ধিয়া প্ৰেমিকৰ শোৱনি কোঠাৰ পৰা উদ্ধাৰ কৰে কিশোৰীগৰাকীক।
উল্লেখ্য যে যোৱা ১৫ দিনে প্ৰেমিকৰ শোৱনি কোঠাত সোমাই থকা প্ৰেমিকাৰ খবৰ লাভ কৰা নাছিল প্ৰেমিকৰ পৰিয়ালৰ লোকেও। প্ৰেমিক প্ৰেমিকাই আৰক্ষীৰ আগত দিয়া স্বীকাৰোক্তিত কয় যে প্ৰেমিকাই প্ৰেমিকৰ শোৱনি কোঠাত নিজে গৈ সোমাই আছিল। প্ৰেমিকেও প্ৰেমিকাক হেৰুৱাৰ ভয়ত মনে মনে কোঠাৰ ভিতৰতে খোৱাৰ ব্যৱস্থা কৰাৰ উপৰিও সকলো প্ৰয়োজনীয় ব্যৱস্থা কৰি দিছিল। এই ঘটনাই তামুলপুৰ অঞ্চলত প্ৰতিক্ৰিয়াৰ সৃষ্টি কৰিছে ৷
