যোৰহাট, 28 মে’: ৰাজ্যজুৰি ৰুষ্ট ৰেমলৰ সংহাৰ অব্যাহত ৷ যোৰহাটত ৰেমলৰ প্ৰভাৱত হোৱা প্ৰচণ্ড ধুমহা-বৰষুণৰ ফলত চলন্ত বাইক আৰোহীৰ ওপৰত পৰিল এজোপা প্ৰকাণ্ড গছ ৷ ঘটনাৰ ফলত গুৰুতৰভাবে আহত হয় এজন লোক । যোৰহাট চিকিৎসা মহাবিদ্যালয় আৰু হাস্পতালত ভৰ্তি কৰোৱা হৈছে আহতজনক ৷
মঙলবাৰে যোৰহাট নগৰৰ নিলগৰ নিমাতী ৰোডৰ পটিয়া গাঁৱত পথৰ দাঁতিত থকা এডাল প্ৰকাণ্ড গছ উভালি পৰাত সংঘটিত হয় দুৰ্ঘটনাটো ৷ আঘাতপ্ৰাপ্ত বাইক আৰোহীজনক স্থানীয় ৰাইজৰ সহযোগত 108 সেৱাৰ জৰিয়তে যোৰহাট চিকিৎসা মহাবিদ্যালয় ও হাস্পতাললৈ প্ৰেৰণ কৰা হয় । আঘাতপ্ৰাপ্ত ব্যক্তিজনে নিমাতী ৰোডৰ পৰা বিশেষ কামত যোৰহাট নগৰলৈ গৈ থকাৰ সময়ত উক্ত শোকাৱহ ঘটনাটো সংঘটিত হয় ।
আহত ব্যক্তিজনৰ পৰিচয় বৰ্তমান পৰ্যন্ত উদ্ধাৰ কৰিব পৰা হোৱা নাই । ইতিমধ্যে ঘটনাস্থলীত যোৰহাট দুৰ্যোগ প্ৰশমন বিভাগৰ দল উপস্থিত হৈ গছ পৰি আৱদ্ধ হৈ পৰা পথটো মুকলি কৰিবলৈ সক্ষম হয় । ফলত কিছু সময় পথটোৰে যাতায়ত সম্পূৰ্ণৰূপে বন্ধ হৈ পৰে ।
ৰাজ্যজুৰি ৰেমলৰ ভয়ংকৰ প্ৰভাৱ:
সমগ্ৰ ৰাজ্যজুৰি ৰেমলৰ ভয়ংকৰ প্ৰভাৱ দেখিবলৈ পোৱা গৈছে । ফলত ঠায়ে ঠায়ে প্ৰচণ্ড জোৰে বতাহ-ধুমুহা অহাৰ লগতে প্ৰৱল বৃষ্টিপাত হৈছে ৷ প্ৰকাণ্ড গছবোৰ উভালি পৰাত ভয়াৱহ পৰিস্থিতিৰ সৃষ্টি হৈছে ৷
ৰাজ্যৰ বিভিন্ন স্থানত ৰেমলৰ প্ৰভাৱত পুৱাৰে পৰা ধাৰাসাৰ বৰষুণ হৈ থকাৰ লগতে ঠায়ে ঠায়ে বতাহ ধুমুহাৰ প্ৰভাৱ পৰাৰ ফলত কৃষি পথাৰৰ লগতে বিভিন্ন সা-সম্পত্তি ধ্বংস হোৱা দেখিবলৈ পোৱা গৈছে । বতাহ, বৰষুণ আৰু ধুমুহাৰ বাবে ঠায়ে ঠায়ে বিদ্যুৎ সংযোগ বিচ্ছিন্ন হৈছে ।
অনাকাংক্ষিত বতৰৰ বাবে যোৰহাট নগৰত জনসাধাৰণৰ গতি-বিধি সেৰেঙা দেখিবলৈ পোৱা গৈছে ।
