স্পৰ্টছ ডেস্ক, 17 ছেপ্তেম্বৰঃ ২০ অক্টোবৰৰ পৰা আৰম্ভ হ’ব ISL ৰ ষষ্ঠ সংস্কৰণ ৷ আই এছ এলত পোন প্ৰথমবাৰৰ বাবে এইবাৰ দেখা পোৱা যাব অসমৰ ডিমা হাছাওৰ প্ৰতিভাৱান ফুটবলাৰ ৰাকেশ প্ৰধানক ৷ আই এছ এলৰ ষষ্ঠ সংস্কৰণৰ বাবে ইতিমধ্যেই চুক্তিবদ্ধ কৰা হৈছে অসমৰ খেলুৱৈগৰাকীক । দলটোৱে অহা 21 অক্টোবৰত বেংগালুৰু এফ চিৰ বিৰুদ্ধে প্ৰথমখন মেচত অৱতীৰ্ণ হোৱাৰ বিপৰীতে ২৬ অক্টোৱৰত প্ৰথমখন ঘৰুৱা মেচত দিল্লী ডাইনামোছৰ বিৰুদ্ধে অৱতীৰ্ণ হ’ব নৰ্থ ইষ্ট ইউনাইটেড এফ চি ৷
শ্বিলং লাজং এফ চিৰ পৰা ফুটবল জগতত অভিষেক ঘটিছিল 22 বছৰীয়া অসমৰ যুৱ প্ৰতিভাৱান খেলুৱৈ ৰাকেশ প্ৰধানৰ ৷ শেহতীয়াকৈ উন্নতমানৰ খেল প্ৰদৰ্শনেৰে সকলোৰে দৃষ্টি আকৰ্ষণ কৰিবলৈ সক্ষম হৈছিল ৰাকেশ প্ৰধানে । যাৰ বাবে নৰ্থ ইষ্ট ইউনাইটেড এফ চি দলত অন্তৰ্ভুক্ত কৰা হৈছে ডিফেণ্ডাৰ খেলুৱৈগৰাকীক । ইতিমধ্যে কঠোৰ অনুশীলন আৰম্ভ কৰিছে খেলুৱৈগৰাকীয়ে ।
শ্বিলং লাজং এফ চিৰ পৰা আই এছ এলৰ এই যাত্ৰা সম্বন্ধে ইটিভি ভাৰতৰ আগত খেলুৱৈগৰাকীয়ে কলে, ‘‘ধৈৰ্য আৰু ত্যাগৰ ফলতে এগৰাকী ভাল খেলুৱৈ হ'ব পাৰি । আই এছ এলত উন্নত খেল প্ৰদৰ্শন কৰি অসমৰ নাম উজলাবলৈ যথোপযুক্ত চেষ্টা চলাম ৷’’ এতিয়া অপেক্ষা মাথো ISL ৰ মহাযুদ্ধলৈ ৷ ইটিভিৰ ভাৰতৰ তৰফৰ পৰাও প্ৰতিভাৱান খেলুৱৈগৰাকীক অলেখ শুভকামনা ।
