স্পৰ্টছ ডেস্ক, 20 আগষ্ট : বুণ্ডেলছিগা চেম্পিয়ন বেয়াৰ্ণ মিউনিখে চেম্পিয়নছ লীগৰ দ্বিতীয় ছেমি ফাইনেলত লিয়নক 3-0 ব্যৱধানত পৰাস্ত কৰে ৷ উল্লেখ্য যে, জ'ছ আলভালাডে ষ্টেডিয়ামত বুধবাৰে অনুষ্ঠিত হৈছিল দ্বিতীয়খন ছেমি ফাইনেল ৷
ইয়াৰ ফলত 23 আগষ্টত অনুষ্ঠিত হ'বলগা টুৰ্ণামেন্টৰ ফাইনেলত পেৰিছ ছেইন্ট জাৰ্মেইনৰ (PSG) মুখামুখি হ'ব বেয়াৰ্ণ নিউনিখ ৷ লিয়নৰ বিৰুদ্ধে মেচত মিউনিখে দূৰ্দান্ত প্ৰদৰ্শন আগবঢ়াই প্ৰতিপক্ষৰ ওপৰত প্ৰভাৱ বিস্তাৰ কৰিবলৈ সক্ষম হয় ৷
18 মিনিটত প্ৰতিযোগিতাৰ প্ৰথমটো গ'ল কৰে মিউনিখৰ ছাৰ্জে জিনাৰ্বিয়ে ৷ 33 মিনিটত পুনৰ জিনাৰ্বিয়ে আন এটা গ'ল কৰি নিজ দলক 2-0 ৰ অগ্ৰগতি প্ৰদান কৰে ৷ প্ৰতিযোগিতাৰ অন্তিম তথা চূড়ান্ত গ'লটো প্ৰদান কৰে ৰবাৰ্ট লেৱানডাউস্কিয়ে ৷ 88 মিনিটত ৰবাৰ্টৰ গ'লেৰে বেয়াৰ্ণ মিউনিখে 3-0 ৰ অগ্ৰগতি লাভ কৰাৰ লগতে প্ৰতিযোগিতাত জয় সাব্যস্ত কৰে ৷
আনহাতে, PSG ৰ ষ্ট্ৰাইকাৰ নেইমাৰক চেম্পিয়নছ লীগৰ ফাইনেলত অংশগ্ৰহণৰ অনুমতি লাভ নকৰাৰ আশংকাই দেখা দিছে ৷ প্ৰতিদ্বন্দীৰ সৈতে পৰিধান কৰা জাৰ্ছীৰ আদান-প্ৰদান কৰাৰ বাবেই প্ৰতিযোগিতাৰ ফাইনেলৰ নেইমাৰৰ অংশগ্ৰহণত অনিশ্চয়তাই দেখা দিছে ৷
উল্লেখ্য যে, প্ৰথমখন ছেমিফাইনেলত PSG য়ে 3-0 ৰ ব্যৱধানত আৰ বি লেইপজিগৰ বিৰুদ্ধে জয় সাব্যস্ত কৰিছিল আৰু প্ৰতিযোগিতাৰ অন্তত নেইমাৰে লেইপজিগৰ ডিফেণ্ডাৰ হালষ্টেনজিগৰ সৈতে চাৰ্ট সলনি কৰা দেখা গৈছিল ৷
চাৰ্টৰ আদান-প্ৰদান কৰাটো ফুটবলৰ এটা প্ৰথা যদিও বৰ্তমানৰ কৰ'ণা ভাইৰাছৰ সংক্ৰমণৰ প্ৰতি লক্ষ্য ৰাখি সতৰ্কতামূলক ব্যৱস্থা হিচাপে UEFA য়ে খেলুৱৈসকলক এই নিয়ম অনুসৰণ নকৰিবলৈ নিৰ্দেশ জাৰি কৰিছিল ৷
লগতে পঢ়ক : প্ৰাগ অ'পেনৰ কোৱাৰ্টাৰ ফাইনেলত সুমিত নাগাল
