স্পৰ্টছ ডেস্ক, ২৫ এপ্ৰিলঃ কৰ'ণা ভাইৰাছৰ বিৰুদ্ধে যুঁজিবলৈ এইবাৰ সহায়ৰ হাতত আগবঢ়াইছে ভাৰতীয় ক্ৰিকেট দলৰ খেলুৱৈ কে এল ৰাহুলে । "Aware Foundation"ক দুৰ্বল শিশুসকলক সহায়ৰ বাবে খেলুৱৈগাৰকীয়ে নিলাম কৰিলে নিজৰ ২০১৯ বিশ্বকাপৰ বেট সহ বহু কেইটা ক্ৰিকেটৰ সামগ্ৰী ।
ৰাহুলে নিলামত নিজৰ ২০১৯ বিশ্বকাপৰ বেটখন ২,৬৪,২২৮ টকাত বিক্ৰী কৰাৰ বিপৰীতে হেলমেট ১,২২,৬৭৭ টকাত, পেড্ছ ৩৩,০২৮ টকাত, এদিনীয়াৰ জাৰ্ছী ১,১৩,২৪০ টকাত, টি-২০ ৰ জাৰ্ছী ১,০৪,৮২৪ টকাত, টেষ্টৰ জাৰ্ছী ১,৩২, ৭৭৪ টকাত আৰু গ্ল'ভছ ২৮,৭৮২ টকাত বিক্ৰী কৰিছে । এই সামগ্ৰী সমূহৰ নিলাম ভাৰতীয় ক্ৰিকেট দলৰ ফেন ক্লাৱ ভাৰত আৰ্মীৰ সহযোগত কৰা হৈছে ।
ৰাহুলে উল্লেখ কৰিছিল, তেওঁ তেওঁৰ ক্ৰিকেটৰ কিছুমান সামগ্ৰী ভাৰত আৰ্মীক দান কৰাৰ কথা । সেই সামগ্ৰী সমূহ ভাৰত আৰ্মীয়ে নিলাম কৰি যিখিনি টকা লাভ কৰিব সেই সমূহ Aware Foundationক প্ৰদান কৰা হ'ব । এই সংস্থাটো শিশুৰ শুশ্ৰষাৰ সৈতে জড়িত । এইটো মোৰ বাবে অত্যন্ত বিশেষ আৰু ইয়াৰ বাবে ইয়াতকৈ ভাল দিন নাহে । বৰ্তমান খেলুৱৈগৰাকী পৰিয়ালৰ সৈতে বেংগালুৰুত আছে ।
