স্পৰ্টছ ডেস্ক,২৮ ডিচেম্বৰ : অষ্ট্ৰেলিয়াৰ ঐতিহাসিক মেলবৰ্ণ ক্ৰিকেট ষ্টেডিয়ামত চলি আছে অষ্ট্ৰেলিয়া আৰু পাকিস্তানৰ মাজত টেষ্ট মেচ । বৃহস্পতিবাৰে বক্সিং ডে টেষ্টৰ সময়তে ৰোমাঞ্চকৰ ঘটনা । ভোজন বিৰতিৰ পাছতে খেলখনৰ পৰৱৰ্তী অধিবেশন আৰম্ভ হোৱাত বিলম্বিত হয় । ইয়াৰ কাৰণ জানিলে আপুনিও আচৰিত হ'ব । জানিব পৰা মতে তৃতীয় আম্পায়াৰ ৰিচাৰ্ড ইলিংৱৰ্থ মেলবৰ্ণ ক্ৰিকেট ষ্টেডিয়ামৰ লিফ্টত আবদ্ধ হৈ আছিল । যাৰ বাবে তেওঁ সময়ত নিজৰ আসনত উপস্থিত হোৱা নাছিল । ফলস্বৰূপে খেলখন পুনৰ আৰম্ভ হোৱাত বিলম্ব হয় ।
খেলখন কেইমিনিটমানৰ বাবে স্থগিত ৰাখিবলগীয়া হয় । খেলপথাৰত থকা আম্পায়াৰদ্বয় জোৱেল উইলচন আৰু মাইকেল গফক এই বিষয়ে অৱগত কৰা হয় । লগে লগে খেলুৱৈ আৰু ষ্টেডিয়ামৰ দৰ্শকসকলৰ মাজত ধেমেলীয়া পৰিৱেশৰ সৃষ্টি হয় । ইফালে তৃতীয় আম্পায়াৰৰ খালী আসনখনো কেমেৰাই বাৰে বাৰে দেখুৱাই থাকিল । যিটোৱে দৰ্শকসকলক অধিক আমোদ দিলে ।
এই সন্দৰ্ভত ক্ৰিকেট অষ্ট্ৰেলিয়াই সামাজিক মাধ্যমৰ এটা পোষ্টত কয় যে খেলখন বিলম্ব হোৱাৰ কাৰণ তৃতীয় আম্পায়াৰগৰাকী লিফ্টত আবদ্ধ হৈ আছিল । আম্পায়াৰগৰাকীয়ে ডাইনিং এলেকাৰ পৰা তেওঁৰ নিৰ্ধাৰিত আসনলৈ উভতি অহাৰ সময়তে লিফ্টত আবদ্ধ হৈ থাকে । অষ্ট্ৰেলিয়াৰ অপেনাৰ ডেভিদ ৱাৰ্ণাৰেও খেলপথাৰত এই পৰিস্থিতিটোক লৈ ধেমেলীয়া কৰা দেখা গৈছিল । ইফালে ৰিজাৰ্ভ আম্পায়াৰ ফিলিপ গিলেস্পীয়ে তৃতীয় আম্পায়াৰ হিচাপে ইলিংৱৰ্থৰ সলনি বক্সৰ ফালে দৌৰি যোৱাৰ দৃশ্যও কেমেৰাত বন্দী হৈছিল ।
সেই সময়ত ৱাৰ্ণাৰৰ সৈতে বেটিং কৰি থকা ষ্টিভ স্মিথে উইলছনক প্ৰশ্ন কৰিছিল যে ইলিংৱৰ্থ উভতি অহালৈকে তেওঁলোকে অপেক্ষা কৰিব পাৰিব নে ? অৱশ্যে কেইমিনিটমানৰ পিচতে ইলিংৱৰ্থ লিফ্টৰ পৰা ওলাই আহি নিজৰ আসনত বহিছিল । পিচত পুনৰ খেল আৰম্ভ হয় ।
লগতে পঢ়ক :ভাৰত-দঃ আফ্ৰিকাৰ প্ৰথম টেষ্ট: প্ৰথম ইনিংছৰ প্ৰথমটো দিনত ৮ উইকেটত ২০৮ ৰান ভাৰতৰ
