টীয়ক, কলিয়াবৰ, 21 আগষ্ট: বিগত কিছু দিনৰ আগতে টীয়কৰ লাহদৈগড় আৰক্ষী চকীৰ অন্তৰ্গত ৰাষ্ট্ৰীয় ঘাইপথৰ মেলেং মেটেলিত এক ডকাইটিৰ কাণ্ড সংঘটিত হৈছিল ৷ তাৰপাচতে ডকাইটি ঘটনাৰ সৈতে জড়িত থকাৰ অভিযোগত আৰক্ষীয়ে শনিবাৰে সমীৰণ বৰা নামৰ ডকাইতটোৰ পিতৃ, ভাতৃ আৰু ঘটনাৰে জড়িত ইণ্ডিগ'খনৰ ড্ৰাইভাৰ জনক আটক কৰিছে ।
আৰক্ষীয়ে ইতিমধ্যে লুট কৰা দুই লাখ টকাৰ একলাখ আঠ হাজাৰ টকা উদ্ধাৰ কৰিবলৈ সক্ষম হৈছে । ইপিনে অভিযুক্ত সমীকৰণৰ পিতৃৰ বিষ্ফোৰক ভাষ্য, ডকাইত সমীৰণক জামিনত মুকলাই দিবলৈ অবিনাশ শইকীয়া নামৰ যুৱক জনে সমীৰণৰ পিতৃক ষাঠি হাজাৰ টকা দাবী কৰিছিল ।
কিন্তু দাবী কৰা সম্পূৰ্ণ ধন আদায় দিবলৈ অসমৰ্থ সমীৰনৰ পিতৃয়ে যেনে তেনে ত্ৰিশ হাজাৰ টকা আদায় দিছিল । কিন্তু অপৰাধীৰ পৰিয়ালৰ পৰা লোৱা ধনৰে জামিন কৰাব নোৱাৰি সেই ধন ঘুৰাই দিয়াৰ সময়ত যুৱকজনে আৰক্ষীক খবৰ দি তেওঁলোকক আটক কৰে ।
লগতে পঢ়কঃ নীলা ছবি নিৰ্মাণ কৰি আন্তঃৰাষ্ট্ৰীয় পৰ্যায়ত তেজপুৰৰ যুৱকৰ ব্যৱসায় !
আনহাতে কলিয়াবৰতো সংঘটিত হৈছে এক চুৰি কাণ্ড ৷ চুইফট বাহনত অহা সাত দুৰ্বৃত্তই কেলিডেন ৰেকাপাহাৰ মাজৰ হাবিতলীয়াৰ পৰা এএচ- ০২-চিচি-৬৩২৩ নম্বৰৰ বলেৰ' পিক-আপ বাহন লৈ উধাও হয় । জানিবপৰা মতে, ডিজুভেলীৰ আলালুদ্দিনৰ বাহনখনে বোকাখাটত কেঁচা চাহপাত দি উভতি অহাৰ পথত নিশা প্ৰায় এক বজাত পূৰ্বৰে পৰা খাপ পিটি আছিল মাৰুতি চুইফট বাহনৰ সাত দুৰ্বৃত্ত ।
ইপিনে পিক-আপ বাহনখনক সমুখত হাতী থকাৰ অজুহাতত ৰখাবলৈ কৈ চালকসহ চাৰিও আৰোহীক চোকা অস্ত্ৰ আৰু পিস্তল দেখুৱাই মাৰ-পিট কৰি পাহৰৰ মাজলৈ নি বেলেগে-বেলেগে বান্ধি পেলাই । তাৰপাচতেই পিক-আপ বাহনখন সৈই ঠাইৰ পৰা লৈ দুৰ্বৃত্তৰ দলটো উধাও হয় ৷ তাৰপাচতে বান্ধি থোৱা আৰোহীকেইজন বান্ধৰ পৰা মুক্ত হৈ আৰক্ষীক খবৰ দিয়ে ।
আনহাতে শালনা আৰক্ষী নিশাই ঘটনাস্থলীত উপস্থিত হৈ চাৰিও আৰোহীকে উদ্ধাৰ কৰে । ইতিমধ্যে ভূক্তভোগীয়ে দিয়া এজাহাৰৰ ভিত্তিতে শালনা আৰক্ষী তদন্ত অব্যাহত ৰাখিছে ।
লগতে পঢ়কঃ জলপ্ৰপাত চাবলৈ গৈ ৰহস্যজনক ভাৱে নিখোজ লখিমপুৰৰ যুৱক
