লাহোৱাল,30 মাৰ্চঃ নিৰ্বাচনৰ সমান্তৰালকৈ ৰাজ্যত প্ৰস্তুতি চলিছে ৰঙালীক আদৰাৰ ৷ ডিব্ৰুগড়ৰ বিভিন্ন প্ৰান্তত দেখা গৈছে বিহুৰ প্ৰস্তুতি । অসমীয়াৰ বাপতি সাহোন ৰঙালী বিহুক আদৰিবলৈ জিলাখনৰ বিভিন্ন প্ৰান্তত বিহু কৰ্মশালাসমূহ আৰম্ভ হৈছে । লাহোৱালৰ সামাজিক, সাংস্কৃতিক অনুষ্ঠান লাহোৱাল মন বহাগী সাংস্কৃতিক কেন্দ্ৰৰ উদ্যোগত আৰম্ভ হোৱা বিহু নাচ আৰু ঢোলবাদ্যৰ কৰ্মশালাখনি আড়ম্বৰপূৰ্ণভাৱে সমাপ্ত হয় ।
লতাশিলৰ বিহু কুঁৱৰী নিবেদিতা বৰা আৰু বিহুৰাণী নিহাৰিকা শইকীয়াই এই বিহু নাচৰ প্ৰশিক্ষণ প্ৰদান কৰে ৷ এই কৰ্মশালাত ঢোলবাদ্যৰ বিষয়ত প্ৰশিক্ষণ প্ৰদান কৰে ঢোলৰ ওজা জিতু গগৈয়ে । লাহোৱালৰ বকুল মাজগাঁৱৰ ৰাজহুৱা খেলপথাৰত অনুষ্ঠিত হোৱা কৰ্মশালাখনিৰ সোমবাৰে সামৰণি পৰে ৷ অন্তিম দিনটোত ৮০ গৰাকীকৈ প্ৰশিক্ষাৰ্থীক একোটাকৈ গছপুলি আৰু মানপত্ৰ প্ৰদান কৰা হয় ।
অনুষ্ঠানটোত সমাজকৰ্মী দয়ানন্দ শ্বাহ, সাংবাদিক বিজন্ত গগৈ, যুৱনেতা দিব্যজিৎ দত্ত, নৱ জাগৃতি যুৱক সংঘৰ সম্পাদক কুশল কোঁৱৰ, শিক্ষক জিতু গগৈকে ধৰি কেইবাগৰাকীও ব্যক্তিয়ে অংশগ্ৰহণ কৰে । মন বহাগী সাংস্কৃতিক কেন্দ্ৰৰ উদ্যোগত অনুষ্ঠিত হোৱা অনুষ্ঠানত যথেষ্ট সংখ্যক ৰাইজে অংশগ্ৰহণ কৰা পৰিলক্ষিত হয় । অনুষ্ঠানত মন বহাগী বিহুৱা দলৰ কৰ্মকতাসকলে বিহুগীত পৰিৱেশন কৰাৰ লগতে অনুষ্ঠানটি সূচাৰুৰূপে সম্পন্ন হোৱাত সহযোগ আগবঢ়ায় ।
লগতে পঢ়কঃ দুৰ্ঘটনাক কেন্দ্ৰ কৰি উত্তপ্ত তিনিচুকীয়া
