নিউজ ডেস্ক, ৮ মাৰ্চ: ছেমছাং ইলেক্ট্ৰ'নিক্সে সোমবাৰে ঘোষণা কৰিছে যে, দক্ষিণ কোৰিয়াত প্ৰভাৱশালী ব্যৱসায়িক স্থিতি সম্প্ৰসাৰণৰ উদ্দেশ্য তেওঁলোকে নতুন স্মাৰ্টফোন মুকলি কৰিব । এই 'Galaxy A42 5G' স্মাৰ্টফোনটো দক্ষিণ কোৰিয়াত বিক্ৰী হোৱা 5G স্মাৰ্টফোন মডেলসমূহৰ ভিতৰত আটাইতকৈ সস্তা হ'ব । য়নহপ সংবাদ গোষ্ঠীয়ে প্ৰকাশ কৰা তথ্য অনুসৰি, স্মাৰ্টফোনটোৰ মূল্য হ'ব ৪০০ ডলাৰ । বিগত বৰ্ষত ইউৰোপ আৰু দক্ষিণ-পূৱ এছিয়াৰ কেইখনমান বজাৰত 'Galaxy A42 5G' স্মাৰ্টফোন মুকলি কৰা হৈছিল ।
'Galaxy A42 5G' স্মাৰ্টফোনৰ বৈশিষ্টসমূহঃ
- 6.6 ইঞ্চিৰ ডিছপ্লেৰ সৈতে সজ্জিত স্মাৰ্টফোনটোত আছে ৰেয়াৰ কোৱাড কেমেৰা, 48MP মুখ্য কেমেৰা, 8MP আল্ট্ৰা ৱাইড লেন্স, 5MP গভীৰতাৰ চেন্সৰ আৰু 5MP মেক্ৰ' কেমেৰা ।
- স্মাৰ্টফোনটোত আছে 20MPৰ ছেলফি কেমেৰা ।
- এই স্মাৰ্টফোনটোত আছে 5,000mAhৰ বেটাৰী, 4-গিগাবাইট(GB)RAM আৰু 128GB আভ্যন্তৰীণ ষ্ট'ৰেজ আৰু ইয়াক মাইক্ৰ' এছ ডি কাৰ্ডৰ জৰিয়তে 1 টেৰাবাইটলৈকে সম্প্ৰসাৰিত কৰিব পৰা যাব ।
বজাৰ গৱেষক কাউণ্টাৰপইণ্ট গৱেষণাৰ মতে, ছেমছাঙে বিগত বৰ্ষত দক্ষিণ কোৰিয়াৰ স্মাৰ্টফোনৰ বজাৰ দখল কৰাত অগ্ৰণী ভূমিকা গ্ৰহণ কৰিছিল । সুলভ মূল্যৰ 5G স্মাৰ্টফোনৰ সৈতে বিশ্বজুৰি ছেমছাঙে শ্বেয়াৰ সম্প্ৰসাৰণৰ আশা প্ৰকাশ কৰিছে । কিয়নো ছেমছাঙৰ চীনা প্ৰতিদ্বন্দী হুৱাৱেই টেকনলজিজ কোম্পানীয়ে আমেৰিকাই আৰোপ কৰা নিষেধাজ্ঞাৰ বাবে এই ক্ষেত্ৰত পিছ পৰি আছে ।
২০২০ চনত ছেমছাঙে বিশ্বব্যাপী স্মাৰ্টফোন বজাৰত আগস্থান দখল কৰিছিল । কিন্তু ইয়াৰ মাৰ্কেট শ্বেয়াৰ ২০ শতাংশৰ পৰা ১৯ শতাংশলৈ হ্ৰাস পাইছে, কিয়নো ইয়াৰ চালান ২৯৬.৮ নিযুত ইউনিটৰ পৰা ২৫৫.৭ নিযুত ইউনিটলৈ হ্ৰাস পাইছে । চলিত বৰ্ষত ছেমছাঙে 'Galaxy A'ৰ বহুকেইটা 5G মডেল মুকলি কৰিব বুলি আশা কৰা হৈছে, য'ত A32, A52 আৰু A72 অন্তৰ্ভুক্ত থাকিব ।
লগতে পঢ়ক:যোৰহাটত মনোনয়ন পত্ৰ দাখিল হিতেন্দ্ৰ নাথ গোস্বামীৰ
