নিউজ ডেস্ক, ১৬ ডিচেম্বৰ : বুধবাৰে নিৰাপত্তাৰক্ষীৰে হোৱা সংঘৰ্ষত এগৰাকী মাওবাদী নিহত হোৱা খবৰ আহি পৰিছে । ছত্তিশগড়ৰ চুকমা জিলাত সংঘৰ্ষৰ সূত্ৰপাত হোৱা বুলি স্থানীয় আৰক্ষীয়ে সংবাদ মাধ্যমৰ আগত প্ৰকাশ কৰিছে ।
চুকমা জিলাৰ জাগাৰগুণ্ডা আৰক্ষী চকীৰ অন্তৰ্গত মিলিয়ামপল্লী-ৰাজপেন্টা হাবিত দিনৰ ভাগত সূত্ৰপাত হয় সংঘৰ্ষৰ । ছত্তিশগড় আৰক্ষীৰ বষ্টৰ ৰেঞ্জৰ মহাপৰিদৰ্শক পি সুন্দৰৰাজে সংবাদমাধ্যমৰ আগত প্ৰকাশ কৰিছে এই তথ্য ।
সেই অনুসৰি, জিলা সংৰক্ষিত বাহিনী আৰু চিআৰপিএফৰ ২২৩ বেটালিয়নৰ এটা যুটীয়া দলৰ সৈতে মুখামুখি হয় মাওবাদীৰ এটা দল । বহুসময় ধৰি চলা সংঘৰ্ষৰ অন্তত এটা মাওবাদী নিহত হোৱাৰ তথ্য নিশ্চিত কৰে অভিযানকাৰী বাহিনীয়ে ।
নিহত মাওবাদীটোৰ পৰা এটা স্থানীয়ভাৱে নিৰ্মিত ইউবিজিএল (under-barrel grenade launcher) আৰু দুটা মাজল লোডিং ৰাইফলৰ লগতে বহুখিনি আপত্তিজনক তথ্য উদ্ধাৰ হয় । বাতৰি লিখাৰ পৰলৈ নিহত মাওবাদীটোৰ পৰিচয় উদ্ধাৰ কৰিব পৰা হোৱা নাই ।
