নেশ্যনেল ডেস্ক,৭ জুলাই : বিজেপিৰ প্ৰাক্তন নেত্ৰী নূপুৰ শৰ্মাৰ বিতৰ্কিত মন্তব্যক লৈ আজিও দেশৰ ভিন্ন প্ৰান্তত প্ৰতিক্ৰিয়া অব্যাহত আছে (Nupur Sharma controversy)। নূপুৰ শৰ্মাৰ বিৰুদ্ধে আনকি বিভিন্ন ৰাজ্যত প্ৰতিবাদো অব্যাহত আছে । ইয়াৰ মাজতে কেইবাখনো ৰাজ্যত সৃষ্টি হোৱা হিংসাত্মক ঘটনাৰ লগত জড়িত বহুতকে আটক কৰিছে আৰক্ষীয়ে । এইবাৰ নূপুৰ শৰ্মাক শিৰচ্ছেদ কৰাৰ ভাবুকি প্ৰদান কৰি ৰঙাঘৰৰ আলহী হ'ল এজন (One who threatened Nupur Sharma arrested in UP)।
বৃহস্পতিবাৰে উত্তৰ প্ৰদেশৰ বৰেলীত আৰক্ষীয়ে গ্ৰেপ্তাৰ কৰে লোকজনক । লোকজন নাছিৰ হুছেইন বুলি জানিব পৰা গৈছে । নাছিৰে সামাজিক মাধ্যমত এটা ভিডিঅ' শ্বেয়াৰ কৰিছিল য'ত নূপুৰ শৰ্মাক শিৰচ্ছেদ কৰাৰ ভাবুকি দিছিল নাছিৰে । এই ভাবুকি প্ৰদানৰ কেইঘণ্টামানৰ ভিতৰতে আৰক্ষীয়ে গ্ৰেপ্তাৰ কৰে নাছিৰ হুছেইনক ।
আৰক্ষী অধীক্ষক ৰাজকুমাৰ আগৰৱালে গ্ৰেপ্তাৰ সন্দৰ্ভত কয় যে নাছিৰ হুছেইনক তেওঁলোকে ভাবুকি প্ৰদান আৰু সাম্প্ৰদায়িক উত্তেজনা সৃষ্টি কৰাৰ অপৰাধত গ্ৰেপ্তাৰ কৰিছে । ফৰিদপুৰ আৰক্ষী থানাৰ অন্তৰ্গত কাচৱান অঞ্চলৰ তেওঁৰ ঘৰৰ পৰাই আৰক্ষীয়ে গ্ৰেপ্তাৰ কৰে । নাছিৰৰ বিৰুদ্ধে ফৰিদপুৰ আৰক্ষী থানাত ভাৰতীয় দণ্ডবিধি আৰু তথ্য প্ৰযুক্তি আইনৰ ধাৰাৰ অধীনত গোচৰ ৰুজু কৰা হৈছে ।
ইফালে উত্তৰ প্ৰদেশত নূপুৰ শৰ্মাৰ বিতৰ্কক লৈ কেইবাটাও হিংসাত্মক ঘটনা সংঘটিত হৈছে । যাৰ বাবে মুখ্যমন্ত্ৰী যোগী আদিত্যনাথে সাম্প্ৰদায়িক উত্তেজনা সৃষ্টিৰ লক্ষ্যৰে কৰা যিকোনো কাৰ্যকলাপ বা মন্তব্যৰ বিৰুদ্ধে শূন্য সহনশীল নীতি গ্ৰহণ কৰিবলৈ আৰক্ষীক নিৰ্দেশ দিছে ।
লগতে পঢ়ক :Bihar Professor Gandhigiri: শিক্ষাৰ্থী নাই বাবে অধ্যাপকে উভতাই দিলে দৰমহা