নিউজ ডেস্ক, 17 জানুৱাৰী: মণিপুৰৰ ভাৰত-ম্যানমাৰ সীমান্তত থকা ব্যৱসায়িক চহৰ ম’ৰেত সংঘটিত এক আক্ৰমণৰ ঘটনাত দুগৰাকী মণিপুৰ আৰক্ষীৰ কমাণ্ডো নিহত হোৱাৰ উপৰিও আহত হৈছে দুগৰাকী কমাণ্ডো ৷ অস্ত্ৰৰে সুসজ্জিত উগ্ৰপন্থী দলে আক্ৰমণ চলাই তেওঁলোকৰ ওপৰত ৷ নিহত কামাণ্ডো দুগৰাকী হৈছে পশ্চিম ইম্ফল জিলাৰ লামছাঙৰ ৱাংখেম সমৰজিৎ আৰু তাখেলাম্বাম শৈলেশ্বৰ ৷
সূত্ৰই প্ৰকাশ কৰা মতে ইমা কংদং লেইৰেম্বি দেৱীৰ মন্দিৰৰ সমীপত বুধবাৰে পুৱা সংঘটিত এক এম্বুশ্বত আহত হৈছিল সমৰজিৎ ৷ অসম ৰাইফলছৰ কী লোকেশ্যন পইন্টত (KLP) চিকিৎসাধীন হৈ থকা অৱস্থাতে বিয়লি সমৰজিতৰ মৃত্যু ঘটে ৷ শৈলেশ্বৰক উগ্ৰপন্থীয়ে বিয়লিৰ ভাগত গুলীয়াই হত্যা কৰে ৷
কনিষ্টবল এন ভীমৰ বাওঁ ভৰিত গুলী লগাৰ বিপৰীতে সহকাৰী উপ-পৰিদৰ্শক সিদ্ধাৰ্থ থকচমো এই আক্ৰমণৰ ঘটনাত আঘাতপ্ৰাপ্ত হৈছে ৷ তেওঁলোকক ম’ৰেৰ পৰা বিমানযোগে ইম্ফলৰ ৰিমছ হাস্পতাললৈ স্থানান্তৰ কৰা হৈছে ৷
এক বিভাগীয় সূত্ৰই প্ৰকাশ কৰা অনুসৰি, ম’ৰেৰ এছ বি আইৰ সমীপত থকা আৰক্ষীৰ এটা গোটক উদ্দেশ্যি উগ্ৰপন্থীয়ে ৰকেট-প্ৰপেলড গ্ৰেণেড নিক্ষেপ কৰে ৷ তাৰ পিচতেই দুয়োপক্ষৰ মাজত সংঘৰ্ষ আৰম্ভ হয় ৷ ভাৰত ম্যানমাৰ সীমান্তৰ চিকিম গাঁও আৰু ম’ৰে চহৰৰ 7 নং ৱাৰ্ডত শেহতীয়াকৈ ধাৰাবাহিকভাৱে এনে আক্ৰমণৰ ঘটনা সংঘটিত হৈ আছে ৷
উগ্ৰপন্থীয়ে অস্থায়ী কমাণ্ডো প’ষ্টত আৰ পি জি গোলাও নিক্ষেপ কৰি সমীপত ৰখাই থোৱা কেইবাখনো বাহনৰ ক্ষতিসাধন কৰে । ইফালে পশ্চিম ইম্ফল জিলাৰ মালমৰ পৰা বৃহৎ সংখ্যক মহিলাই আৰক্ষীৰ হত্যাকাণ্ডৰ প্ৰতিবাদত বিমানবন্দৰলৈ যোৱা পথ অৱৰোধ কৰে । সমৰজিতৰ হত্যাকাণ্ডৰ সন্দৰ্ভত গঠিত যুটীয়া সমিতিৰ মুখপাত্ৰ এল প্ৰেমচান্দে সাংবাদিকৰ আগত কয় যে “দোষীক গ্ৰেপ্তাৰ কৰি ন্যায় প্ৰদান নকৰালৈকে মৃত আৰক্ষী জোৱানজনৰ মৃতদেহ পৰিয়ালৰ সদস্যই গ্ৰহণ নকৰাৰ হুংকাৰ দিছে ।’’
