তেজপুৰ, 31 আগষ্ট : এতিয়াও শান্ত হোৱা নাই মণিপুৰৰ পৰিস্থিতি ৷ মণিপুৰৰ বিষ্ণুপুৰ জিলাৰ থামনাপোকপিত বৃহস্পতিবাৰে পুনৰ নিৰাপত্তাৰক্ষী আৰু সন্দেহযুক্ত কুকি উগ্ৰপন্থীৰ মাজত সংঘৰ্ষ সংঘটিত হয় ৷ বৃহস্পতিবাৰে প্ৰায় 2.40 বজাত মৰ্টাৰ আৰু বন্দুকৰ আক্ৰমণত 8 জন লোক নিহত হোৱাৰ লগতে 8 জন লোক আহত হয় ৷ নিহত এজনৰ নাম থামনাপোকপিৰ পেবাম দেবান (51) বুলি চিনাক্ত কৰা হৈছে । মৃত লোককেইজনৰ ভিতৰত 6 গৰাকী কুকি উগ্ৰপন্থীৰ মৃত্যু হৈছে বুলি স্থানীয় সংবাদমাধ্যমত প্ৰকাশ হৈছে ৷ সংঘৰ্ষ হোৱা অঞ্চলটোত চাৰিজন সাংবাদিক আৱদ্ধ হৈ আছে বুলিও জানিব পৰা গৈছে । এই ঘটনাত নিহত অন্য দুজন এজন খেতিয়ক আৰু এজন সাধাৰণ লোক । আনহাতে মুঠ আহত 8 জনৰ ভিতৰত 2 জন সুৰক্ষা বাহিনীৰ লোক ।
উল্লেখ্য যে যোৱা দুদিন ধৰি বিষ্ণুপুৰ আৰু কাংভাই অঞ্চলত কুকি উগ্ৰপন্থীয়ে গুলীচালনা কৰাৰ পিচতে আজি বোমা বিস্ফোৰণৰ ঘটনা সংঘটিত কৰিছে। ফলত সম্প্ৰতি অঞ্চলটোত অতিৰিক্ত সুৰক্ষা বাহিনী নিয়োগ কৰিছে প্ৰশাসনে ৷
ইয়াৰ সমান্তৰালকৈ হিংসা জৰ্জৰিত মণিপুৰত লুটপাত কৰি নিয়া অস্ত্ৰ শস্ত্ৰৰ উদ্ধাৰ অভিযান অব্যাহত ৰাখিছে মণিপুৰ আৰক্ষী আৰু কেন্দ্ৰীয় সুৰক্ষা বাহিনীয়ে । যোৱা 24 ঘণ্টাত আৰক্ষীয়ে চলোৱা উদ্ধাৰ আৰু অনুসন্ধান অভিযানত, অস্ত্ৰ, গোলা বাৰুদ আৰু বিস্ফোৰক সামগ্ৰীৰ উদ্ধাৰ কৰে । আৰক্ষীয়ে পাহাৰীয়া অঞ্চল কাংপোকপি, থৌবাল, চুৰাচান্দপুৰ আৰু ইম্ফল-পশ্চিম জিলাৰ পাৰ্শ্বৱৰ্তী আৰু দুৰ্গম অঞ্চলসমূহত অভিযান অব্যাহত ৰাখিছে ।
উক্ত অঞ্চলত নিৰাপত্তা বাহিনীয়ে অভিযান চলাই পাঁচটা অত্যাধুনিক অস্ত্ৰ উদ্ধাৰ কৰে, লগতে 31 টা গোলা বাৰুদ ,19 বিধ বিস্ফোৰক সামগ্ৰী আৰু 3 টা আই ই ডিৰ লগতে কাংপকপি আৰু ইম্ফল-পশ্চিম জিলাৰ পৰা 10 মিটাৰ কৰ্ডটেক্স উদ্ধাৰ কৰে। এই সময়ছোৱাত মণিপুৰৰ বিভিন্ন জিলাত, পাহাৰ আৰু উপত্যকা উভয়তে মুঠ 130 টা নাকা/ চেকপইণ্ট স্থাপন কৰিছে ৷
আজিলৈকে ৰাজ্যখনৰ বিভিন্ন জিলাত আইন উলংঘাৰ সৈতে জড়িত 1646 জন ব্যক্তিক আৰক্ষীয়ে আটক কৰে বুলি জানিবলৈ দিয়ে । ৰাজ্যখনৰ কিছু ভিতৰুৱা অঞ্চলত চেপা উত্তেজনা অব্যাহত আছে যদিও যোৱা 24 ঘণ্টাত সামগ্ৰিকভাৱে পুনৰ হিংসা বৃদ্ধি পাইছে ৰাজ্যখনত ৷
লগতে পঢ়ক: Manipur Assembly session adjourned : বিৰোধীৰ হুলস্থূলৰ মাজতে মণিপুৰ বিধানসভাৰ অধিবেশন স্থগিত
