নেশ্যনেল ডেস্ক, 15 আগষ্ট: মঙলবাৰে সন্ধিয়া তীৰ্থ নগৰী মথুৰাৰ বৃন্দাবনৰ বাংকে বিহাৰী মন্দিৰৰ ওচৰত এক ভয়ংকৰ দুৰ্ঘটনা সংঘটিত হয় । বাংকে বিহাৰী মন্দিৰৰ ওচৰৰ এটা পুৰণি অট্টালিকাৰ ওপৰৰ অংশ হঠাতে খহি পৰাৰ ফলত সংঘটিত হয় ঘটনাটো ৷ দুৰ্ঘটনাটোত বৰ্তমানলৈকে অতি কমেও পাঁচজন লোকৰ মৃত্যু হোৱা বুলি জানিব পৰা গৈছে ৷ ইফালে, এই ভয়ংকৰ দুৰ্ঘটনাটোত বহুলোক আহত হৈছে ।
আহতসকলৰ সঠিক সংখ্যা এতিয়াও জানিব পৰা হোৱা নাই । আৰক্ষী আৰু প্ৰশাসনৰ দল ঘটনাস্থলীত উপস্থিত হৈ উদ্ধাৰ অভিযান আৰম্ভ কৰে ৷ তীৰ্থযাত্ৰীসকলে বিহাৰী মন্দিৰৰ ওচৰৰ পৰা ওলাই যোৱাৰ সময়তে এই দুৰ্ঘটনাটো সংঘটিত হয় ৷
বাংকে বিহাৰী মন্দিৰৰ পৰা মাত্ৰ 200 মিটাৰ দূৰত্বত এই দুৰ্ঘটনাটো সংঘটিত হয় ৷ পুৰণি অট্টালিকাটোৰ এটা অংশ খহি পৰাৰ পাচতে স্থানীয় লোকৰ মাজত হাহাকাৰ অৱস্থাৰ সৃষ্টি হয় ৷ ওচৰৰ একাংশ লোকে দুৰ্ঘটনাত পতিত সকলক সহায়ৰ বাবে ঘটনাস্থলীলৈ দৌৰি যায় ৷
আৰক্ষী আৰু প্ৰশাসনৰ লোকসকল ঘটনাস্থলীত উপস্থিত হৈ ধ্বংসাৱশেষৰ তলত আৱদ্ধ লোকসকলক উদ্ধাৰ কৰিবলৈ আৰম্ভ কৰে ৷ ইফালে, যথা সময়ত ঘটনাস্থলীত এম্বুলেন্স আহি নোপোৱাৰ বাবে কেইবাগৰাকীও লোকক ই-ৰিক্সাতে সমীপৱৰ্তী চিকিৎসালয়লৈ প্ৰেৰণ কৰা হয় ৷
এতিয়ালৈকে, দুৰ্ঘটনাটোত পাঁচজন লোকৰ মৃত্যু হোৱাৰ খবৰ পোৱা গৈছে ৷ দুৰ্ঘটনাটোত বহুলোক আহত হৈছে ৷ দুৰ্ঘটনাটোত নিহত পাঁচজন লোকৰ ভিতৰত তিনিজন আছিল কানপুৰৰ ৷ মৃতসকলক ক্ৰমে গীতা কাশ্যপ, অৰবিন্দ কুমাৰ, ৰশ্মি গুপ্তা আৰু অঞ্জু মুগাই বুলি চিনাক্ত কৰা হৈছে । অৱশ্যে এজনৰ পৰিচয় এতিয়াও উদ্ধাৰ হোৱা নাই ৷
লগতে পঢ়ক: Road mishap: শোকাৱহ! পথ দুৰ্ঘটনাত প্ৰাণ হেৰুৱালে একে পৰিয়ালৰ 6 জনে
