নিউজ ডেস্ক, 22 অক্টোবৰঃ ভাৰত-পাক সীমান্তৰ নিয়ন্ত্ৰণৰেখাত অব্যাহত আছে উত্তেজনা ৷ বিগত কিছুদিনৰ পৰা ভাৰতীয় সেনাক লক্ষ্য কৰি পাকিস্তানে অব্যাহত ৰাখিছে ধাৰাসাৰ গোলাবৰ্ষণ ৷ যুদ্ধবিৰতি চুক্তি উলংঘণ কৰি ভাৰতীয় সেনাৰ লগতে অসামৰিক লোকক লক্ষ্য কৰি পাকিস্তানে অব্যাহত ৰাখিছে গোলাবৰ্ষণ ৷
লগতে পঢ়কঃ পুত্ৰকো সেনাবাহিনীত যোগদান কৰোৱাৰ সপোন দেখিছিল শ্বহীদ পদম বাহাদুৰে
পাকিস্তানী সেনাৰ গোলাবৰ্ষণত দুগৰাকীকৈ ভাৰতীয় সৈনিক শ্বহীদ হোৱাৰ লগতে এগৰাকী অসামৰিক লোক নিহত হৈছে ৷ নিয়ন্ত্ৰণৰেখাৰ টাংধাৰ ছেক্টৰত সংঘটিত এই ঘটনাত শ্বহীদ হয় অসমৰ পদম বাহাদুৰ শ্ৰেষ্ঠাৰ লগতে আন এগৰাকী সেনা জোৱান ৷ শেহতীয়াকৈ জম্মু-কাশ্মীৰৰ পুঞ্চ জিলাত ভাৰতীয় সেনাই উদ্ধাৰ কৰে পাকিস্তানৰ সেনাৰ তিনিটাকৈ মৰ্টাৰ ৷ 120 এমএমৰ তিনিওটা মৰ্টাৰ স্থলসেনাই নিৰাপদ স্থানত বিস্ফোৰণ ঘটাবলৈ সক্ষম হয় ৷ জিলাখনৰ কাচবা আৰু কিৰ্নী ছেক্টৰত উদ্ধাৰ হৈছিল তিনিওটা মৰ্টাৰ ছেল ৷
লগতে পঢ়কঃ ডিফুত বৃহৎ পৰিমাণৰ বিস্ফোৰক উদ্ধাৰ : এজনক আটক
পাকিস্তানী সেনাৰ ধাৰাবাহিক আক্ৰমণৰ প্ৰত্যুত্তৰ ইতিমধ্যে প্ৰদান কৰিছে ভাৰতীয় স্থলসেনাই ৷ স্থলসেনাই বিধ্বংসী আৰ্টিলাৰী টোপ ব্যৱহাৰ কৰি পাকিস্তান অধ্যুষিত কাশ্মীৰত জইচ-ই-মহম্মদৰ লগতে হিজবুল মুজাহিদীনৰ চাৰিটা ঘাটি ইতিমধ্যেই উৎখাত কৰিছে ৷ এই আক্ৰমণত পাকিস্তান সমৰ্থিত সন্ত্ৰাসবাদী সংগঠন দুটাৰ 30ৰ পৰা 35 টা সন্ত্ৰাসবাদী নিহত হোৱাৰ লগতে পাকিস্তানী সেনাৰ ৰেঞ্জাৰ দলৰ 6গৰাকী জোৱান নিহত হোৱাৰ তথ্য প্ৰকাশ কৰিছে প্ৰতিৰক্ষা মন্ত্ৰালয়ে ৷
