নগাঁও, ৮ মে‘: নগাঁও জিলাৰ বটদ্ৰৱাত পুনৰ সংঘটিত হৈছে আন এক জঘন্য ঘটনা । এইবাৰ বটদ্ৰৱাৰ পৱিত্ৰ গংগাৰ পাৰো যেন কলুষিত কৰিলে এটা লম্পটে । গংগাৰ পাৰলৈ মাতি নি এগৰাকী কিশোৰীৰ সৈতে শাৰীৰিক সম্পৰ্ক স্থাপন কৰাৰ এক গুৰুতৰ অভিযোগ উত্থাপিত হৈছে । এই জঘন্য ঘটনা সংঘটিত হৈছে গুৰুজনাৰ পৱিত্ৰ জন্মস্থান বটদ্ৰৱাত ।
উত্থাপন হোৱা অভিযোগ অনুসৰি নগাঁৱৰেই জুৰীয়াৰ কলাডুবা অঞ্চলৰ তৈবুৰ ৰহমান নামৰ এটা লম্পটে বটদ্ৰৱাৰ কিশোৰী এগৰাকীৰ সৈতে প্ৰেমৰ নামত যৌন নিৰ্যাতন চলাই আহিছিল । শেহতীয়াকৈ বটদ্ৰৱাৰ গংগাৰ পাৰলৈয়ো কিশোৰীগৰাকীক মাতি নি যৌন নিৰ্যাতন চলোৱাত স্থানীয় একাংশ লোকে প্ৰত্যক্ষ কৰি পৰিয়ালৰ লোকক অৱগত কৰে । আজি ভুক্তভোগী কিশোৰীগৰাকীৰ পৰিয়ালৰ লোকে এই সন্দৰ্ভত অভিযোগ উত্থাপন কৰি কয় যে তৈবুৰ ৰহমানে বিভিন্ন প্ৰলোভনেৰে যৌন নিৰ্যাতন চলাই আহিছিল যদিও তেওঁলোক এই বিষয়ে জ্ঞাত নাছিল ।
ইয়াৰ পিচত পৰিয়ালৰ লোকে বটদ্ৰৱা আৰক্ষী থানাত এজাহাৰ দাখিল কৰে । কিশোৰীগৰাকীৰ পৰিয়ালৰ লোকে দাখিল কৰা এজাহাৰৰ ভিত্তিত বটদ্ৰৱা আৰক্ষীয়ে এক গোচৰ ৰুজু কৰে । ইয়াৰ পিচতেই ঘটনা সন্দৰ্ভত তদন্ত আৰম্ভ কৰি অভিযুক্ত তৈবুৰ ৰহমানক আটক কৰিবলৈ সক্ষম হয় বটদ্ৰৱা আৰক্ষী । সম্প্ৰতি অভিযুক্ত তৈবুৰ ৰহমানক মাৰাথন জেৰা অব্যাহত ৰাখিছে বটদ্ৰবা আৰক্ষীয়ে । কিশোৰীক প্ৰেমৰ নামত যৌন নিৰ্যাতন চলোৱা লম্পট তৈবুৰ ৰহমানৰ বিৰুদ্ধে দৃষ্টান্তমূলক শাস্তিৰ ব্যৱস্থা কৰি ভুক্তভোগী পৰিয়ালটোক ন্যায় প্ৰদানৰ বাবে দাবী জনাইছে স্থানীয় ৰাইজে । ইপিনে, বিভিন্ন মহলেও এই স্থানত এনে অনৈতিক কাৰ্য সংঘটিত কৰা অভিযুক্তক কঠোৰ শাস্তি প্ৰদানৰ দাবী জনাইছে ।
