মৰাণ,১৭ মে': বহু জল্পনা-কল্পনাৰ অন্তত সামৰণি পৰিল ৰাজ্যত তিনিটা পৰ্যায়ৰ লোকসভা নিৰ্বাচন । এতিয়া কোনে কিমান ভোট পাব, কোনে ৰাইজৰ আশীৰ্বাদত দিল্লীলৈ যাব তাৰ হিচাপ নিকাচ কৰাত ব্যস্ত সকলো ৰাজনৈতিক দল । সকলোৱে অপেক্ষা কৰিছে ৪ জুনলৈ । কিন্তু ৪ তাৰিখৰ ভোট গণনাত বিজেপিৰ নেতা-কৰ্মীয়ে খেলিমেলি কৰাৰ ভয়ে খেদিছে কংগ্ৰেছক ।
চৰাইদেউৰ সোণাৰিত শুকুৰবাৰে তাৰে উমান দিলে যোৰহাট লোকসভা সমষ্টিৰ কংগ্ৰেছ দলৰ প্ৰাৰ্থী তথা সাংসদ গৌৰৱ গগৈয়ে । আগন্তুক ৪ জুনৰ ফলাফলক লৈ আত্মবিশ্বাসী কংগ্ৰেছ । লোকসভা নিৰ্বাচনৰ ফলাফল ঘোষণাৰ পূৰ্বে দলীয়-কৰ্মকৰ্তাৰ সৈতে মত বিনিময় যোৰহাট লোকসভা সমষ্টিৰ কংগ্ৰেছ প্ৰাৰ্থী গৌৰৱ গগৈৰ । বিজেপি দলৰ কৰ্মীয়ে যাতে কোনো ধৰণৰ আইন ভংগ কৰিব নোৱাৰে তাৰ প্ৰতি সতৰ্ক হোৱাৰ আহ্বান জনাই সাংসদ তথা কংগ্ৰেছ নেতা গৌৰৱ গগৈয়ে ।
চৰাইদেউ সোণাৰিৰ মডিনা কমপ্লেক্স হোটেল গ্ৰীণ ভিউত অনুষ্ঠিত এক সভাত দলীয় কৰ্মীৰ লগত মতবিনিময় সভাত অংশগ্ৰহণ কৰে গৌৰৱ গগৈয়ে । এই সভাতে অহা ৪ জুলাইত কেনেকৈ ভোট গণনাৰ দায়িত্বত থকা কংগ্ৰেছ কৰ্মীসকলে ভূমিকা ল'ব লাগিব সেই বিষয়ে আলোচনা কৰে । এই সভাত অংশগ্ৰহণ কৰি গৌৰৱ গগৈয়ে কয়, "কংগ্ৰেছ দলৰ লোকসভা ফলাফল ভাল হ'ব । লোকসভাৰ ফলাফলৰ পাছতে দলটো কেনেকৈ ভাল কৰিব পাৰি তাৰ বাবে কাম কৰা হ'ব ।"
লগতে বিজেপিক সমালোচনা কৰি তেওঁ কয়, "এইবাৰ নিৰ্বাচনত বিজেপিৰ প্ৰচাৰ আটাইতকৈ দুৰ্বল আছিল । অহংকাৰ, দলীয় বিসম্বাদ আৰু মাটিৰ পৰা আঁতৰি যোৱা বাবেই তেওঁলোকৰ প্ৰচাৰ দুৰ্বল হৈছিল ।" উক্ত অনুষ্ঠানত গৌৰৱ গগৈৰ সৈতে বিৰোধী দলপতি দেৱব্ৰত শইকীয়াকে ধৰি চৰাইদেউ জিলা কংগ্ৰেছৰ বিষয়ববীয়া উপস্থিত থাকে ।
