প্ৰতি বছৰে জুন মাহৰ তৃতীয়টো দেওবাৰ পিতৃসকলৰ বাবে উৎসৰ্গা কৰা হয়, যিটো দিন আমি পিতৃ দিৱস হিচাপে পালন কৰো । আমাৰ পিতৃৰ মৰম আৰু ত্যাগৰ বাবে আমি ধন্যবাদ জনোৱা এটা বিশেষ দিন । দেউতা হৈছে সেইজন ব্যক্তি যিয়ে আমাক প্ৰতিটো খোজতে সহায় কৰে । ছায়াৰ দৰে আমাৰ কাষত থাকে, মজবুত স্তম্ভৰ দৰে আমাৰ সৈতে থিয় দিয়ে ৷ যিয়ে নিজৰ সন্তানৰ বাবে সকলো দুখ-কষ্ট হাঁহি হাঁহি সহ্য কৰে ৷ যাৰ শাসনতো মৰম, স্নেহ লুকাই থাকে, যাৰ প্ৰতিটো কথাই আমাৰ বাবে গুৰুত্বপূৰ্ণ তেৱেই হৈছে দেউতা ।
আমি পিতৃ দিৱস উপলক্ষে পিতৃক যিমানেই মৰম নিদিওঁ কিয়, সেয়া সদায় কম যেন লাগে । কিন্তু, আমি এই বিশেষ দিনটোত তেওঁৰ বাবে কিবা এটা কৰি এই দিনটো আৰু অধিক বিশেষ কৰি তুলিব পাৰো । তেওঁক কিছু ছাৰপ্ৰাইজৰ জৰিয়তে সুখী কৰিব পাৰো ৷
সেয়ে আহক- আজি পিতৃ দিৱস উপলক্ষে কিছু এনে ছাৰপ্ৰাইজৰ বিষয়ে আমি আপোনালোকক কম যাৰ দ্বাৰা আপুনি পিতৃ দিৱসক আপোনাৰ পিতৃৰ বাবে আৰু অধিক স্মৰণীয় কৰি তুলিব পাৰে ।
১/ তেওঁলোকৰ পছন্দৰ বিশেষ খাদ্য তৈয়াৰ কৰক
কোৱা হয় যে, হৃদয়ৰ ৰাস্তা পেটেৰেই হৈ যায় । গতিকে এই পিতৃ দিৱসত আপোনাৰ পিতৃৰ পছন্দৰ বিশেষ খাদ্যই প্ৰস্তুত কৰা যাওক ৷ তেওঁৰ শৈশৱৰ প্ৰিয় খাদ্যই হওক বা ৰেষ্টুৰেণ্ট ষ্টাইলৰ খাদ্যই হওক, তেওঁৰ পছন্দৰ খাদ্য প্ৰস্তুত কৰি আপুনি তেওঁক সুখী কৰিব পাৰে ।
২/ পুৰণি স্মৃতি ৰোমন্থন কৰক
পিতৃৰ সৈতে কটোৱা পুৰণি মুহূৰ্তবোৰ প্ৰতিগৰাকী সন্তানৰ বাবে অতিকৈ বিশেষ । পিতৃ দিৱসৰ দিনা তেওঁৰ পুৰণি ফটো সংগ্ৰহ কৰি কোলাজ বনাব পাৰে । লগতে তেওঁৰ লগত বহি সেই ফটোবোৰৰ লগত জড়িত স্মৃতিবোৰ সতেজ কৰি তুলিব পাৰে । আপুনি তেওঁৰ শৈশৱৰ বন্ধু বা আত্মীয়কো ফোন কৰিব পাৰে, যাতে তেওঁলোকে পুৰণি দিনবোৰ মনত পেলাই সুখী হৈ পৰে ।
৩/ তেওঁৰ চখ পূৰণ কৰাত সহায় কৰক
পিতৃৰ চখৰ বিষয়ে জানি লওক । হয়তো তেওঁৰ বাগিচাৰ প্ৰতি আকৰ্ষণ আছে বা পুৰণি গান এটা শিকাৰ হাবিয়াস আছে । পিতৃ দিৱস উপলক্ষে তেওঁৰ চখৰ লগত জড়িত উপহাৰ দিব পাৰে বা সহায় কৰিব পাৰে । তেওঁৰ বাবে পিতৃ দিৱসৰ দিনা তেওঁৰ পচন্দৰ গীতবোৰ ৰেডিঅ' বা স্পীকাৰত বজাই একেলগে গাই আনন্দ কৰক ৷
৪/ চিঠি লিখি তেওঁৰ গুৰুত্ব বুজাবলৈ চেষ্টা কৰক
আজিৰ ডিজিটেল যুগত হাতে লিখা চিঠিৰ গুৰুত্ব বহুত বাঢ়িছে । পিতৃ দিৱসৰ দিনা দেউতাকলৈ চিঠি লিখি কওক যে তেওঁ আপোনাৰ বাবে কিমান গুৰুত্বপূৰ্ণ । তেওঁৰ মৰম আৰু ত্যাগৰ বাবে ধন্যবাদ জনাওক । বিশ্বাস কৰক এই সৰু চিঠিখনে তেওঁৰ হৃদয় চুই যাব ।
৫/ ছাৰপ্ৰাইজ পাৰ্টীৰ পৰিকল্পনা কৰক
আপোনাৰ পৰিয়ালৰ সদস্য আৰু ঘনিষ্ঠ বন্ধুৰ সৈতে দেউতাৰ বাবে এটা ছাৰপ্ৰাইজ পাৰ্টিৰ পৰিকল্পনা কৰক । পাৰ্টিত তেওঁৰ প্ৰিয় খাদ্য, সংগীত আৰু কেকৰ ব্যৱস্থা কৰক । এই ছাৰপ্ৰাইজ পাৰ্টিটো তেওঁ নিশ্চয় ভাল পাব ।
এই সৰু সৰু উপায়েৰে আপুনি আপোনাৰ পিতৃৰ বাবে পিতৃ দিৱসৰ দিনটো অতিকৈ বিশেষ কৰি তুলিব পাৰে ৷ ই টিভি ভাৰতৰ তৰফৰ পৰাও থাকিল প্ৰত্যেকগৰাকী পিতৃলৈ পিতৃ দিৱসৰ অনেক শুভেচ্ছা ৷
